BUU ókili Sırııadaǵy barlyq qylmysty tergeýge shaqyrdy
ASTANA. KAZINFORM — BUU Adam quqyqtary jónindegi basqarmasynyń ókili Tamın ál-Hıtan Sırııada, sonyń ishinde Bashar Asad bıligi kezeńinde jasalǵan barlyq qylmystardy tergeýge shaqyrdy, dep jazdy Anadolý.
Jenevadaǵy BUU keńsesinde ótken apta saıynǵy dástúrli brıfıngte sóılegen ál-Hıtan Sırııada Bashar Asad rejıminiń qulaǵanyna bir jyl tolatynyn eske salyp, qazirgi bılik buryn bolǵan quqyqbuzýshylyqtardy joıýǵa baǵyttalǵan úmit kúttiretin qadamdar jasap jatqanyn atap ótti. Alaıda onyń aıtýynsha, bul qadamdar tek bastamasy ǵana.
Ál-Hıtan Izraıldiń Sırııaǵa jasalǵan qaıtalanǵan soqqylary, reıdteri jáne basyp alynǵan aýmaqtardy keńeıtýi sońǵy jyldyń negizgi talqylaý taqyryptaryna aınalǵanyn atap ótti.
«Biz beıbit turǵyndar arasyndaǵy qaza tapqandar, ustalǵandar jáne úılerge tintý júrgizilgeni týraly habarlamalar alyp otyrmyz, sonyń ishinde sońǵy Damask mańyndaǵy ızraıldik shabýyldan keıin de. Ótken jáne qazirgi barlyq quqyqbuzýshylyqtar táýelsiz, jan-jaqty jáne ashyq túrde tergelýi tıis, al kináliler jazalanýy kerek», dedi ol.
Ál-Hıtan BUU-nyń Adam quqyqtary jónindegi Joǵarǵy komıssary Folker Tıýrk bılikti bul quqyqbuzýshylyqtardyń túpki sebepterin joıýǵa baǵyttalǵan sharalar qabyldaýǵa shaqyrǵanyn eske saldy, sondaı-aq ádildik, beıbitshilik pen qaýipsizdikti qamtamasyz etý tabysty ótpeli kezeńniń túpkilikti sharttary ekenin atap ótti.
«Jábirlenýshilerdiń zalaldy óteý jáne ótemaqy alý quqyǵy qamtamasyz etilýi tıis. BUU Adam quqyqtary basqarmasy sırııalyqtardyń ótpeli kezeńdegi ınklıýzıvti ádildikti qamtamasyz etý jáne zań ústemdigin nyǵaıtý jónindegi kúsh-jigerin bizdiń baǵdarlamamyz arqyly qoldaıdy», dedi ol.
«Anadolý» agenttigi tilshisiniń BUU Adam quqyqtary jónindegi basqarmasynyń Sırııadaǵy jumysy týraly suraǵyna jaýap bergen ál-Hıtan Asad rejımi bılik etken kezeńde Sırııa aýmaǵyna kirý uzaq ýaqyt múmkin bolmaǵanyn, barlyq quqyqbuzýshylyqtar qashyqtan tirkelgenin aıtty.
«Jańa úkimetpen biz kirý protsesin bastadyq jáne elde turaqty qarym-qatynas ornatý baǵytynda jumys istep jatyrmyz. Búgingi tańda Damaskide segiz qyzmetker jumys isteıdi», dedi ol.
Ál-Hıtan Sırııa bıligi eldegi baǵdarlamalardy iske asyrýǵa ýaqytsha ruqsat bergenin, sondaı-aq Damaskide keńseniń resmı túrde ashylýyna ruqsat berý úderisiniń aıaqtalatynyna úmit bildirgenin aıtty.
«Árıne, Sırııanyń túrli óńirlerine kirý áli de qıyn, ári keıbir aýdandardaǵy turaqsyz qaýipsizdik jaǵdaıyna baılanysty aıtarlyqtaı logıstıkalyq daıyndyq qajet», dep qosty ol.
Eske sala ketsek, buǵan deıin BUU Sýdandaǵy zorlyq-zombylyqty toqtatýǵa shaqyrǵanyn jazdyq.
Sondaı-aq Birikken Ulttar Uıymy bıyl 378 myń sırııalyqtyń Lıvannan óz otanyna oralǵanyn habarlady.