BUU ókili Qazaqstannyń tótenshe jaǵdaılar salasyndaǵy tsıfrlyq tehnologııalaryn joǵary baǵalady
ASTANA. KAZINFORM – 24 sáýirde Qazaqstan Respýblıkasynyń Tótenshe jaǵdaılar mınıstri general-leıtenant Shyńǵys Árinov BUU Bas hatshysynyń arnaıy ókili – Tabıǵı apattar qaýpin azaıtý jónindegi basqarma basshysy Kamal Kıshormen kelissózder júrgizdi. Bul týraly Tótenshe jaǵdaılar mınıstrligi habarlady.
Kezdesý TJM Strategııalyq josparlaý jáne jedel basqarý ortalyǵynda ótti. Onda BUU delegatsııasyna tótenshe jaǵdaılardy taldaý jáne boljaýǵa arnalǵan tsıfrlyq júıeler, sonyń ishinde jasandy ıntellektke negizdelgen jáne naqty ýaqyt rejıminde monıtorıng júrgizetin sheshimder tanystyryldy.
Kamal Kıshor áreket etý júıesiniń damý deńgeıin joǵary baǵalap: «Qazaqstan – tabıǵı qaýip-qaterlerdiń alýan túrliligi joǵary el. Sizdiń mınıstrliktiń keshendi tásili erekshe áser qaldyrady. Vedomstvonyń áleýeti, onyń ishinde Jedel basqarý ortalyǵy sizderdiń óńirlik deńgeıde ǵana emes, álemdik deńgeıde de aldyńǵy qatarda ekenderińizdi kórsetedi. Ortalyqtyń qyzmeti men naqty ýaqyt rejımindegi monıtorıng júrgizý jumysy Brıýsseldegi Basqarý ortalyǵyn eske salady», - dedi.
Mınıstr tsıfrlyq tehnologııalardy damytý bıylǵy jyldy Tsıfrlandyrý jáne jasandy ıntellekt jyly dep jarııalaǵan Prezıdent Qasym-Jomart Toqaevtyń bastamalary aıasyndaǵy basymdyq ekenin atap ótti.
BUU-nyń beıindi qurylymdarymen yntymaqtastyq aıasynda Qazaqstan tótenshe jaǵdaılarǵa tózimdilikti arttyrý salasynda eleýli nátıjelerge qol jetkizdi. Atap aıtqanda elordaǵa halyqaralyq turaqtylyq ortalyǵy mártebesi berildi. Mundaı mártebe álemniń nebári 42 qalasyna ǵana berilgen, al Astana Ortalyq Azııada alǵashqylardyń biri bolyp ıe boldy.
Sondaı-aq Almaty qalasynda ornalasqan Tótenshe jaǵdaılar jáne tabıǵı apattar qaýpin azaıtý jónindegi óńirlik ortalyqtyń damýyna BUU-nyń qosqan úlesi erekshe ataldy. Onda Ortalyq Azııa elderiniń tótenshe jaǵdaılar salasynyń mamandaryna arnalǵan ushqyshsyz avıatsııa boıynsha onlaın mektep jumys isteıdi.
Buǵan deıin Talǵarda tótenshe jaǵdaıǵa qarsy zamanaýı dabyl júıesi qosylatynyn habarlaǵanbyz.
