BUU ókili: Barlyq halyqaralyq jýrnalısterge Gazada jumys isteýge ruqsat berilýi tıis

ASTANA. KAZINFORM – BUU halyqaralyq jýrnalısterdiń Gazaǵa jedel ári qaýipsiz kirýin talap etedi, dep habarlaıdy Anadoly.

Izraıl kirgizýden bas tartqan barlyq halyqaralyq jýrnalısterge Gaza sektoryna jedel, qaýipsiz jáne kedergisiz kirýge múmkindik berilýi qajet. 

Bul týraly BUU Adam quqyqtary jónindegi Joǵarǵy komıssary basqarmasynyń ókili Tamın ál-Hıtan málimdedi.

— Bizdiń áriptesterimiz Gazada álemge shyndyqty jetkizip otyrdy, al Izraıl halyqaralyq jýrnalısterdi bul aımaqqa kirgizbeıdi. Gazadaǵy jýrnalısterge jasalǵan shabýyl — sol jerde bolyp jatqan shyndyqqa jasalǵan shabýyl emes pe? , — dedi ol.

Ál-Hıtannyń aıtýynsha, 10 tamyzda Gaza qalasyndaǵy «Ash-Shıfa» aýrýhanasynyń janynda ornalasqan jýrnalıster lagerine Izraıl áskeri soqqy jasap, palestınalyq alty jýrnalıst qaza tapqan. Qurbandardyń arasynda Al Jazeera tilshileri Anas ash-Sherıf pen Muhammed Kýraıka da bolǵan. Bul oqıǵa halyqaralyq gýmanıtarlyq quqyq normalarynyń «óreskel buzylýy» retinde baǵalandy.

— Biz barlyq jýrnalıske Gazada jedel, qaýipsiz jáne kedergisiz jumys isteý múmkindigi berilýin talap etemiz, — dedi BUU ókili. 

Aıta ketelik Gaza sektorynda ashtyqtan taǵy 5 adam kóz jumdy.