BUU ókili álemde dinı nysandardy qıratý áreketin synǵa aldy

ASTANA. KAZINFORM – BUU Órkenıetter alıansynyń (AQSh) dırektory Nıhal Saad dúnıejúzindegi dinı nysandardy qorǵaýdyń mańyzdylyǵy týraly aıtty.

Onyń aıtýynsha, Qazaqstanda ǵasyrlar boıy álemdik dinderdiń jáne etnostardyń ókilderi tatý-tátti ómir súrip keledi.

- Qazaqstan saıası jáne dinı salalardaǵy dıalogty ilgeriletip, halyqaralyq saıasat pen Sezdiń qyzmeti arqyly óz shekarasynan tys jerlerde halyqtar arasyndaǵy ózara túsinistikti nyǵaıtyp keledi. Sonymen qatar, Qazaqstan halyqtar men ártúrli mádenı toptardyń arasyndaǵy yntymaqtastyqty nyǵaıtýdaǵy mıssııamyzdy qoldaıtyn mańyzdy seriktesimiz, - dedi Nıhal Saad Álemdik jáne dástúrli dinder lıderleri Sezi hatshylyǵynyń XXIII otyrysynda.

Onyń sózine qaraǵanda, Sezdi jáne BUU Alıansyn janjaldardy sheshý úshin dıalogty qoldaıtyn jáne beıbitshilik úshin túsinistik pen yntymaqtastyqty ilgeriletetin kóptegen ortaq maqsattar biriktiredi.

Sondaı-aq Alıans dırektory Qazaqstanǵa dinı nysandardyń qaýipsizdigin qamtamasyz etý jónindegi is-sharalar josparyn júzege asyrýǵa qoldaý kórsetkeni úshin alǵys aıtty.

- Ol 2019 jyldyń qyrkúıeginde ázirlendi. Alıanstyń is-qımyl jospary dinı nysandarǵa jasalǵan shabýyldarǵa jaýap berýge arnalǵan. Jahandyq kúsh-jigerge qaramastan, biz dúnıejúzinde dinı nysandarǵa birneshe shabýyldy kórdik. Alıans barlyq ǵıbadat oryndary terror men qantógis nysandary emes, adamdarǵa pana retinde bolýy kerek ekenin alǵa tartyp otyr. Adamdar óz nanym-senimderin tynyshtyqta jáne eshbir úreısiz júzege asyra alýy kerek, - dedi Nıhal Saad.

Budan buryn habarlanǵandaı, QR Senatynyń tóraǵasy Máýlen Áshimbaev halyqaralyq qaýipsizdik boıynsha barlyq áreket BUU jarǵysyna sáıkes bolýy tıis ekenin aıtty.