BUU ókilderi Mosýlda hımııalyq qarý qoldanylýy múmkindigin aıtty
ASTANA. QazAqparat - BUU ókilderi Iraktyń Mosýl qalasyndada hımııalyq qarý qoldanylǵandyǵy dáleldengen jaǵdaıda, mundaı áreket áskerı qylmys jáne halyqaralyq gýmanıtarlyq quqyqty buzý dep tanylatynyn eskertti. Bul týraly 4 naýryzda BUU Irakqa gýmanıtarlyq kómek boıynsha úılestirýshisi Lız Grande aıtty, dep habarlady korrespondent.net.
«Bul sumdyq. Hımııalyq qarýdy qoldanǵan kim bolsa da, oǵan aqtaý joq», - dedi Grande.
Onyń máimdemesi Irak úkimet kúshteri men Islam memleketi tobynyń sodyrlary arasynda Mosýl úshin uzaqqa sozylǵan aıqas ýaqytynda hımııalyq qarý paıdalandy degen habarlama taraǵannan keıin kelesi kúni paıda boldy. Ony taraptardyń qaısy paıdalanǵany týraly derek bolǵan joq.
«Eger hımııalyq qarý qoldanylǵany rastalsa, shabýyldyń maqsaty ne, qurbany kim bolǵanyna qaramastan, halyqaralyq gýmanıtarlyq quqyqty buzý jáne áskerı qylmys bolyp sanalady», - dedi Grande.
BUU Dúnıejúzilik densaýlyq saqtaý uıymy Mosýldaǵy yqtımal hımııalyq qarý áserinen 12 adam (áıelder men balalar) em alyp jatqanyn habarlady. Onyń tórteýinde «ýly zattyń terige áserine baılanysty belgileri bar», dedi uıym ókilderi. Naýqastar Mosýldyń shyǵys bóliginde ýlanǵan.
3 naýryzda Qyzyl Krest Halyqaralyq komıtetiniń qyzmetkerleri jeti adamnyń hımııalyq zatpen zaqymdaný belgilerimen aýrýhanaǵa jatqyzylǵanyn aıtty.
Eske salsaq, budan buryn Irak áskeri Mosýldyń batys bóligindegi Vadı-al-Hadjar aýmaǵyn ıelengeni habarlanǵan.
