BUU ókilderi Qazaqstannyń qaqtyǵys aımaǵynan óz azamattaryn elge qaıtarý tájirıbesimen tanysty

NUR-SULTAN. QazAqparat - BUU ókilderi qaqtyǵys aımaqtarynan óz azamattaryn elge qaıtarý boıynsha Qazaqstannyń tájirıbesimen tanysty, dep habarlaıdy QR SІM baspasóz qyzmeti.

QR Syrtqy ister mınıstrligi BUU Esirtki jáne qylmys jónindegi basqarmasymen birlesip, BUU Esirtki jáne qylmys jónindegi basqarmasynyń atqarýshy dırektory, BUU Vena bólimshesiniń Bas dırektory – Gada Fathı Valı hanymnyń sapary aıasynda «Qaqtyǵys aımaqtarynan qaıtarylǵan azamattardy, olardyń otbasy múshelerin qylmystyq qýdalaý, ońaltý jáne reıntegratsııalaý máseleleri boıynsha joǵary deńgeıdegi dıalog» Qazaqstan Respýblıkasynyń tájirıbesi» taqyrybynda dóńgelek ústel ótkizdi.

QR AQDM Din isteri komıteti tóraǵasynyń orynbasary Baýyrjan Bákirov «Jýsan» operatsııasy aıasynda terrorıstik belsendi aımaqtardan qaıtarylǵan azamattardy ońaltý jáne reıntegratsııalaý jaǵdaıy týraly baıandama jasady.

Іs-sharaǵa QR Prezıdentiniń kómekshisi Erlan Karın, Syrtqy ister mınıstriniń orynbasary Aqan Rahmetýllın, memlekettik organdardyń, halyqaralyq uıymdar men dıplomatııalyq mıssııalardyń ókilderi qatysty. Moderator retinde QR Adam quqyqtary jónindegi ýákili Elvıra Ázimova boldy.

Esterińizge sala keteıik, azamattarymyzdy terrorıstik belsendi aımaqtardan qaıtarý boıynsha «Jýsan» gýmanıtarlyq operatsııasy 2019 jyly bastaldy, nátıjesinde búgingi kúni elge 600-den astam azamat oraldy, olardyń basym bóligi - áıelder men balalar.