BUU-nyń mereıtoılyq sessııasy: Antonıý Gýterrısh málimdeme jasady
«Osynaý ataýly data qarsańynda hatshylyq (BUU Bas Assambleıasynyń hatshylyǵy) búkil álemde mıllıonnan astam adamdy qamtyǵan jahandyq talqylaýdy ótkizip, onyń aıasynda ásirese, jastardyń daýysyna basymdyq berdi. Talqylaýǵa qatysýshylardyń barlyǵy da ózderiniń qorqynyshymen, bolashaqqa degen úmitimen bólisti. Olar búgingi kúnniń ózekti problemalaryn sheshý úshin halyqaralyq yntymaqtastyq ómirlik mańyzǵa ıe bolyp otyrǵandyǵyn aıtýda. COVID-19 indeti jaǵdaıynda mundaı yntymaqtastyqqa qejettilik barynsha ózekti bola túskendigine de mán berýde. Olar álemge densaýlyq saqtaý júıesiniń, barlyǵyna negizgi qyzmetterdi kórsetý júıesiniń qajettigin atap ótip otyr. Olar úshin BUU – bul onyń kúshimen álemde jaqsarta túsýge bolatyn qural. Olar bizdi «qazirgi synaqtarǵa abyroımen tótep beredi« dep úmit artady», - dedi Antonıý Gýterrısh.
Onyń atap ótýinshe, bul rettegi jaýapkershilik BUU-ǵa múshe memleketterge artylyp otyr. Óıtkeni, múshe memleketter Birikken Ulttar Uıymyn qurdy ári olar álemdi jaqsarta túsýge múmkindik beretin quraldardy paıdalana otyryp, oǵan qamqorlyqpen jáne uqyptylyqpen qaraýy tıis.
«Bul – BUU halyqtary aldyndaǵy paryzymyz. Bul – ortalyq qundylyqtardyń jalǵasýy úshin ómirin qıǵan bitimgerler, dıplomattar, gýmanıtarlyq kómek qyzmetkerleri jáne barlyǵy aldyndaǵy – mindetimiz. Uıymymyzdy qurýshylar óz qyzmetterin janjal órship turǵan kezde bastaǵan bolatyn. Endi biz álemdi qaýipten aryltý úshin osy joldy jalǵastyrýymyz qajet», - dedi ol.
Eske salaıyq, BUU Bas Assambleıasynyń jumysyna Qazaqstan Prezıdenti Qasym-Jomart Toqaev ta qatysyp, aǵylshyn tilinde eki beıneúndeý jasaıdy. Onyń biri - uıymnyń 75 jyldyǵyna arnalsa, ekinshisi – kún tártibindegi debatqa qatysty. Dıplomattar men sholýshylardyń pikirinshe, bul jolǵy assambleıa uıymnyń mereıtoıynan bólek, qashyqtan ZOOM-dıplomatııa túrinde ótetinimen erekshelenedi.
Búgin merekelik bólimdegi shaǵyn resmı rásimde Antonıo Gýtterısh shtab-páterde bolyp, sóz sóıleıtinin buǵan deıin habarlaǵan bolatynbyz.
Mereıtoılyq sessııa «Biz qalaıtyn bolashaq, bizge qajet Birikken Ulttar Uıymy: mýltılateralızmge ujymdyq beıildiligimizdi naqtylaý» degenuranmen ótedi.
