«BUU-nyń kúshi álsiregen shaqta, EQYU-nyń yqpaly kúsheıýi jahan úshin aýadaı qajet» - respýblıkalyq basylymdarǵa sholý

«Halyqtardy qarym-qatynastar jaqyndatady». «Egemen Qazaqstan» gazetiniń beısenbilik nómirinde osy taqyryppen jaryq kórgen maqalada QR Premer-Mınıstri Kárim Másimovtiń Shanhaı yntymaqtastyq uıymyna múshe elder Úkimet basshylary keńesiniń kezekti otyrysyna qatysý úshin Tájikstan astanasy Dýshanbege barǵandyǵy jaıynda jazylǵan. Basylymnyń atap ótýinshe, keshe QR Úkimet basshysy Tájikstan Úkimetiniń basshysy Akıl Akılovpen shaǵyn jáne keńeıtilgen quramda kezdesýler ótkizip, nátıjesinde birqatar mańyzdy qujattarǵa qol qoıylǵan. Resmı sapardaǵy taǵy bir mańyzdy oqıǵa Úkimeti basshysynyń Tájikstan Respýblıkasynyń Prezıdenti Emomalı Rahmonmen kezdesýi boldy. Ekijaqty keńeıtilgen otyrys barysynda Tájikstan Prezıdenti Emomalı Rahmon Qazaqstan men Tájikstan arasyndaǵy áriptestikti nyǵaıta túsýdiń mańyzdylyǵyna toqtalǵan. "Qazaqstan óziniń ekonomıkalyq damýynda aıtarlyqtaı joǵary jetistikterge qol jetkizdi. Halqynyń áleýmettik turmysynda da jaqsy kórsetkishterge ıe. Eldiń joǵary jetistikteriniń dáleli retinde taıaýda Astana qalasynda ótetin EQYU Sammıtin atap kórsetýge bolady. Sammıttiń kún tártibine engizilgen máselelerdiń naqty talqylanýy onyń barlyq qatysýshylaryn aımaqtaǵy turaqtylyq pen qaýipsizdikti qamtamasyz etýge arnalǵan sheshimder qabyldaýǵa baǵyttaıtynyna senimdimin", - deıdi Tájikstan basshysy.

Sanaýly kúnderden keıin qazaq eliniń tórinde ótetin EQYU Sammıti dúnıejúzilik BAQ-tyń nazaryna ilikkenine biraz ýaqyt boldy. Osynaý aıtýly tarıhı bas qosýdy ótkizgeli otyrǵan elimizdiń saıası, ekonomıkalyq, mádenı jetistikteri olarda jıi kóterilip álem jurtshylyǵyna pash etilýde. «Egemen Qazaqstan» gazetiniń búgingi nómirinde solardyń birparasy jaryq kórip otyr. Máselen, EuroNews basylymynyń jazýynsha, RF-nyń EQYU-daǵy Turaqty ókili Anýar Azımov sammıttiń Qazaqstan usynyp otyrǵan qorytyndy qujatyndaǵy basymdyqtardy Reseıdiń qoldaıtyndyǵyn jetkizgen. Al Itar-TASS agenttigi bylaı dep jazady: «Sammıt ótetin kúnderi órt jáne ónerkásiptik qaýipsizdikti saqtaý úshin Astanada 557 qutqarýshy adamdar men 95 tehnıka jáne Tótenshe jaǵdaılar mınıstrliginiń 2 tikushaǵy jumys isteıtin bolady».

***
«Keshe qalaýlylar «temir tulpary» bar qazaqstandyqtarǵa da «jańajyldyq syılyq» syılady. Aıtpaqshy, oǵan da bastamashy bolǵan - Ult kóshbasshysy. Memlekettik organdardy ózderine tán emes qyzmet túrlerinen aryltý máselesi Elbasy N.Nazarbaev jarııalaǵan quqyq qorǵaý organdary men sot júıesi reformasynda qarastyryldy. Sondaǵy el basshylyǵynyń bir talabyna sáıkes, kólikterdi tehnıkalyq baıqaý fýnktsııalary Kólik jáne kommýnıkatsııa mınıstrliginiń quzyrynan «tárkilenip», naryqqa - básekelestik ortaǵa tabys etilmek», - dep jazady «Aıqyn» gazeti búgingi nómirinde jaryq kórgen «Kólikti tehnıkalyq tekserý básekeles ortaǵa beriledi» degen taqyryptaǵy maqalasynda. Basylymnyń atap ótýinshe, sonymen qatar Memleket basshysy usynǵan jańa «tehnıkalyq baıqaýdy ótkizý tártibi» halyqaralyq tehnıkalyq baıqaý sertıfıkattaryn berýdi kózdeıdi. Al Úkimettiń túsiniktemesine sáıkes, qolynda osyndaı halyqaralyq sertıfıkat bar barlyq qazaqstandyq kólik operatorlary Eýrodaq, Reseı, Belarýs, Ýkraına sııaqty 38 el aýmaǵynda júk-jolaýshylar tasymalymen esh kedergisiz aınalysa alady eken.

«Aıqyn» gazetiniń jazýynsha, keshegi aptada álemniń túkpir-túk­pi­rinde atalyp ótken barsha musylman­dardyń ulyq merekesi - Qurban aıt Máskeý basshylyǵy, BAQ ókilderi men ártisterin biraz oılandyryp tastaǵan sııaqty. Bul jaıynda basylymnyń beısenbilik sanyndaǵy «Máskeý neden qorqady?» degen maqalada egjeı-tegjeıli baıandalǵan. «Olar Qurban aıttyń Máskeýde osynshama keń kólemde atalyp ótkenine alańdaýshylyǵyn jasyrmaıdy. Eń qyzyǵy, Andreı Makarevıch, Laıma Vaıkýle, Mıhaıl Shırvındt, Leonıd ıArmolnık bastaǵan bir top artıster qaýymy Máskeýdiń jańa basshysy Sergeı Sobıanınge Qurban aıt merekesinde qala kóshelerinde qoı soıýǵa tyıym salý qajettigin surap hat joldaǵan», - dep jazady basylym.

***

Egin oraǵy naýqany aıaqtalǵanymen, onyń mańyndaǵy daý-damaı, kerisinshe, endi boı kóterip jatyr. Naqtyraq aıtqanda, ol aýyl sharýashylyǵy saqtandyrý tólemine qatysty. Máselen, «Alash aınasy» gazetiniń baıandaýynsha, Qostanaı oblysynyń Fedorov aýdany naryǵynda bes saqtandyrý kompanııasy jumys istegen. Búginderi sonyń bireýinen dıqandar saqtandyrý tólemin ala almaı otyr. Al qalǵandary tıisti shartqa sáıkes esep aıyrysqan. Saqtandyrý tólemin jasamaı otyrǵan - dıqandarǵa bóten kompanııa emes, ózderi múshe Qazaqstan fermerler odaǵyna qarasty «Ózara saqtandyrý qoǵamy» bolyp otyr. Jazylǵan jaıttyń baıybyna barǵyńyz kelse, basylymdaǵy «Saqtandyrsań saqtaımyz» degenderi qaıda?» degen taqyryptaǵy maqalany nazaryńyzdan jiberip almańyz.

Osy basylymnyń turaqty «Dat!» aıdarynda QR Parlamenti Májilisiniń depýtaty Aldan Smaıylmen aradaǵy suhbat «BUU-nyń kúshi álsiregen shaqta, EQYU-nyń yqpaly kúsheıýi jahan úshin aýadaı qajet» degen taqyryppen berilgen. Tilshiniń barlyq saýaldaryna tuşymdy jaýap bergen halyq qalaýlysy: «Alash eli alda turǵan oqıǵanyń mán-mazmunyn, onyń EQYU-ǵa múshe elderge, odan tys memleketterge tıgizetin ıgi yqpalyn aldyn ala tereń sezine de bermespiz. Bir aqıqattyń basy ashyq: búginde Qazaqstan jáne onyń Tuńǵysh Prezıdenti jahanǵa jaqqan, álemdi úndestik pen ózara senimge bastaǵan tyń ıdeıalarymen halyqaralyq bıikke kóterilse, kúni erteń Astana Qazaq eliniń tórinen ǵalamnyń tórine aınalady»,- deıdi.

***

«Gaagada (Nıderlandy Koroldigi) osy eldegi Qazaqstan elshiliginiń bastamasy boıynsha keshe bolǵan konferentsııada etnodinı pikir alýandyǵy men kóshi-qon máseleleri talqylandy», - dep jazady «Kazahstanskaıa pravda» gazeti. Qazaqstannyń EQYU-ǵa tóraǵalyq etýi aıasynda uıymdastyrylǵan sharaǵa Senattyń Áleýmettik-mádenı damý komıtetiniń tóraǵasy Aqan Bıjanov bastaǵan qazaqstandyq parlamentshiler belsendi túrde qatysýda. Konferentsııada Qazaqstan delegatsııasynyń basshysy A.Bıjanov negizgi baıandama jasady. Talqylanyp otyrǵan taqyryptyń ózekti ekenin atap óte kelip, senator "toleranttylyq pen mádenıetaralyq únqatysýdy ilgeriletý EQYU-ǵa Qazaqstannyń tóraǵalyq etýindegi negizgi basymdyq jáne "qosymsha qun" retinde qarastyrylatynyn" aıtty. Sonymen qatar ol EQYU-ǵa tóraǵalyq etken kezdegi Qazaqstannyń bastamalary týraly aıta kelip, ultaralyq jáne konfessııaaralyq kelisimdi nyǵaıtý salasyndaǵy memlekettik saıasat máselelerine toqtalǵan.