BUU-nyń FAO uıymy Qazaqstanda qus tumaýyna (H5N1) qatysty epıdemıologııalyq trenıngter ótkizýde
ASTANA. Mamyrdyń 13-i. QazAqparat /Jasulan Amanbaıuly/ - Astanada Aýyl sharýashylyǵy jáne Densaýlyq saqtaý mınıstrlikteriniń jetekshi mamandaryna arnalǵan qus tumaýyna (H5N1) qarsy epıdemıologııalyq sharalardy qoldaný taqyrybynda trenıngter ótýde,
dep habarlaıdy QazAqparat.
Trenıng BUU-nyń Azyq-túlik jáne aýyl sharýashylyǵy uıymynyń (Food and Agriculture Organization, FAO) Qazaqstandaǵy arnaıy 2005-2015 jyldarǵa arnalǵan baǵdarlamasy aıasynda ótýde. Oǵan Qazaqstannyń barlyq aımaqtarynan 30-ǵa tarta sanepıdqadaǵalaý jáne veterınarlyq qyzmettiń mamandary qatysýda.
FAO-nyń Qazaqstandaǵy qus tumaýy boıynsha ulttyq koordınatory, veterınarlyq ǵylymdarynyń doktory Qalamqas Shampıevanyń aıtýynsha, jyldyń osy mezgilinde qustardyń Ońtústik-Shyǵys Azııa, Úndistan jáne Pákistan aýmaǵynan Qazaqstan arqyly Reseıge, Eýropa jerlerine kóshýi baıqalady. Sondyqtan osyndaı trenıngter men semınarlar qazaqstandyq mamandardyń biliktilikterin arttyryp, daıyndyqtaryn shyńdaý úshin jıi uıymdastyrylýy qajet.
FAO uıymy Qazaqstannyń Aqmola, Pavlodar memlekettik laboratorııalardyń tolyq jaraqtalýyna, shetelde mamandardy oqytýǵa atsalysyp keledi. Bıyl 6 maman álemdegi 5 eń iri referens laboratorııalardyń - biri Italııanyń referens zerthanasynda bilimderin shyńdap qaıtady.
Osyndaı trenıngter Almaty qalasynda da uıymdastyrylmaq. Sonymen qatar 2006 jyly qus tumaýyna shaldyqqan aqqýdyń óleksesi tabylǵan Aqtaý portynda aımaqtyq sanepıdemıologtarǵa arnalǵan tájirıbelik semınarlar ótkiziledi.
Astanadaǵy trenıngter 3 kúnge sozylady.
