BUU-nyń ekologııalyq sammıtinde mańyzdy kelisim jasaldy

ASTANA. QazAqparat - Álemniń 200-ge jýyq eli 2030 jylǵa qaraı túrlerdiń joıylýyn toqtatý úshin jer betiniń kem degende 30 paıyzyna arnaıy qorǵanys jasaýdy kózdep otyr, delingen BUU-nyń Monrealdaǵy konferentsııasynyń qorytyndy deklaratsııasynda. Bul týraly QazAqparat Deutsche Welle agenttigine silteme jasap habarlaıdy.

Kanadanyń Monreal qalasynda ótken BUU-nyń konferentsııasy barysynda eki aptalyq kelissózderden keıin tabıǵatty qorǵaý týraly tarıhı kelisim qabyldandy. COP15 sammıtine qatysýshy 200-ge jýyq memleket 2030 jylǵa qaraı planeta betiniń keminde 30 paıyzyn erekshe qorǵaý týraly erejeni qamtıtyn qorytyndy rezolıýtsııany qoldady.

Sonymen qatar, bıoártúrlilikti qorǵaýǵa kóbirek qarjy bólý jospary quryldy. Damyǵan elder 2025 jylǵa deıin kedeı elderge shamamen 20 mıllıard AQSh dollaryn (18,8 mıllıard eýro) bólýi tıis.

Konferentsııaǵa tóraǵalyq etýshi Qytaı sol kúni qorytyndy deklaratsııa jobasyn usyndy, keıinirek Kongo Demokratııalyq Respýblıkasynyń qarsylyqtaryna qaramastan jahandyq kelisimniń qabyldanǵanyn jarııalady. Afrıka memleketiniń ókilderi bul qujatty qoldaı almaıtyndyqtaryn aıtty.

Germanııanyń qorshaǵan ortany, tabıǵatty qorǵaý, ıadrolyq qaýipsizdik jáne tutynýshylardyń quqyqtaryn qorǵaý mınıstri Shteffı Lemke COP15 deklaratsııasyn túrlerdiń joıylýyn toqtatýǵa baǵyttalǵan «batyl qadam» dep atady.

«Tabıǵatty qorǵaý arqyly biz ózimizdi qorǵaımyz jáne balalarymyzǵa durys ómir súretin ortany qamtamasyz etemiz», - dedi Lemke Monrealda.

Germanııanyń «jasyldar» partııasy ókiliniń aıtýynsha, 2030 jylǵa qaraı pestıtsıdterdi qoldanýmen baılanysty adamdar men qorshaǵan ortaǵa tónetin qaýipterdi eki ese azaıtý kózdelgen. Sonymen qatar, jyl saıyn tabıǵatqa zııan keltiretin 500 mıllıard dollarlyq sýbsıdııalardy joıý josparlandy, dep qosty Shteffı Lemke.

Dúnıejúzilik jabaıy tabıǵat qory (WWF) da bul sheshimdi quptady. Sarapshylardyń aıtýynsha, osy ǵasyrdyń sońyna qaraı jer betinde 1 mıllıonǵa jýyq túr joıylyp ketýi múmkin.

15-shi Dúnıejúzilik tabıǵatty qorǵaý týraly sammıt (COP15) 2020 jyly Qytaıda ótýi kerek edi, biraq pandemııaǵa baılanysty keıinge qaldyrylǵan. Otyrystyń birinshi bóligi qazan aıynda Qytaıdyń Kýnmıninde beınekonferentsııa rejıminde ótti. Konferentsııanyń ekinshi bólimi 7 jeltoqsan kúni Monrealda ashyldy.