BUU-nyń Bangkoktaǵy sessııasynda Elbasy bastamalarynyń nátıjeleri tanystyryldy

BANGKOK. QazAqparat - 27-28 mamyr kúnderi QR Syrtqy ister mınıstriniń birinshi orynbasary Muhtar Tileýberdi bastaǵan Qazaqstan Respýblıkasynyń delegatsııasy Bangkok qalasynda ótip jatqan BUU-nyń Azııa men Tynyq muhıtqa arnalǵan Ekonomıkalyq jáne áleýmettik komıssııasynyń (AzTMEÁK) 75-sessııasyna qatysýda. Bul týraly QazAqparat QR SІM-ge silteme jasap habarlaıdy.

"Іs-sharanyń mınıstrlik segmenti aıasynda M.Tileýberdi Qazaqstan týraly eldik málimdeme jasady. Onyń barysynda ulttyq, óńirlik jáne jahandyq deńgeılerde ornyqty damý maqsattaryn júzege asyrýdaǵy elimizdiń ilgerileýi týraly habarlady. Atap aıtqanda, Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev usynǵan bastamalardy júzege asyrý arqasynda adamdardyń múmkindikterin keńeıtý jáne áleýmettik ádilettilikti qamtamasyz etý salasyndaǵy biregeı nátıjeler atap ótildi. Sonymen qatar, M.Tileýberdi aýdıtorııaǵa tranzıttik-kólik áleýetin damytý salasyndaǵy, sonyń ishinde «Nurly jol» ınfraqurylymdyq damý baǵdarlamasy men «Bir beldeý, bir jol» Qytaı bastamasynyń túıisý kontekstinde eldiń jetistikteri týraly aqparat berdi. Óńirlik kontekste «Astana» Halyqaralyq qarjy ortalyǵy, jasyl tehnologııalar men ınvestıtsııalyq jobalar halyqaralyq ortalyǵy, Memlekettik qyzmettiń óńirlik habynyń, Ortalyq Azııa ekonomıkalaryna arnalǵan BUU arnaıy baǵdarlamasynyń (SPEKA) qyzmeti jáne Almaty qalasynda Ornyqty damý maqsattary boıynsha BUU óńiraralyq ortalyǵyn qurý jónindegi bastama baıandaldy", - delingen baspasóz baıanynda.

Іs-shara sheńberinde Qazaqstannyń Taılandtaǵy Elshiligi Qytaı Halyq Respýblıkasynyń Turaqty ókildigimen jáne AzTMEÁK Hatshylyǵymen birlesip «Bir beldeý, bir jol» bastamasy men Turaqty damý salasyndaǵy BUU-nyń 2030 jylǵa deıingi kezeńge arnalǵan kún tártibiniń ózara baılanysyna arnalǵan saıd-ıvent uıymdastyrdy. Paneldik pikiralmasý barysynda Elshi Raýshan Esbýlatova ınfraqurylymdyq baılanystardy damytýdyń qazaqstandyq tájirıbesimen bólisip, Uly Jibek jolyn jańǵyrtý ıdeıasyn júzege asyrýdaǵy Qazaqstannyń rólin atap ótti.

Sessııa aıasynda M.Tileýberdi BUU Bas hatshysynyń orynbasary-AzTMEÁK Atqarýshy hatshysy A.Alısdjabanamen jáne QHR Syrtqy ister mınıstriniń kómekshisi J.Tsýnmen ekijaqty kezdesýler ótkizdi.