BUU-nyń arnaıy baıandamashysyna etnosaralyq toleranttylyq pen qoǵamdyq kelisimniń qazaqstandyq modeli tanystyryldy

ASTANA. QazAqparat - Astana qalasynda Beıbitshilik jáne kelisim saraıynda Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Toǵjanov BUU-nyń Beıbit jınalystar jáne birlesý quqyǵy máseleleri jónindegi arnaıy baıandamashysy Maına Kıaımen kezdesti. Bul týraly Assambleıanyń baspasóz qyzmetinen habarlady.

Kezdesýge QR Parlamenti Májilisiniń depýtattary Egor Kappel jáne ıÝrıı Tımoşenko, QR Prezıdenti janyndaǵy «Qoǵamdyq kelisim» RMM-niń dırektory Natalıa Kalashnıkova, Ortalyq Azııa aımaǵyndaǵy etnosaralyq jáne konfessııaaralyq qatynastardy zertteý ortalyǵynyń meńgerýshisi Aıgúl Sádýaqasova qatysty.

Kezdesý barysynda BUU-nyń arnaıy baıandamashysyna etnosaralyq toleranttylyq pen qoǵamdyq kelisimniń qazaqstandyq modeli tanystyryldy. E.Toǵjanov Maına Kıaıge QHA-nyń qurylý tarıhy, konstıtýtsııalyq mártebesi, onyń mindetteri men etnosaralyq toleranttylyq pen qoǵamdyq kelisimdi nyǵaıtý boıynsha atqarylyp otyrǵan jumys, QHA atynan saılanǵan depýtattardyń qyzmeti, onyń halyqaralyq yntymaqtastyǵy týraly aıtyp berdi. QHA Tóraǵasynyń orynbasary E.Toǵjanov: «Budan buryn BUU-nyń Bas hatshysy Pan Gı Mýn elimizge jasaǵan sapar barysynda Qazaqstan halqy Assambleıasynyń jumysymen keńinen tanysyp, Assambleıanyń prıntsıpteri BUU-nyń prıntsıpterine tolyǵymen saı keletini jóninde málimdegen», - dep atap ótti. Sonymen qatar, E.Toǵjanov: «Barlyq etnıkalyq toptardyń ókilderi biryńǵaı jáne teń azamattyq-quqyqtyq jáne qoǵamdyq mártebege ıe. Búgingi kúni Qazaqstanda 800-den astam etnomádenı birlestikter jumys isteıdi, olar 2014 jyly 11 myńnan astam kópshilik is-sharany ótkizdi. Qazaqstandaǵy etnıkalyq toptardyń beıbit jınalystar jáne birlesý quqyqtary qamtamasyz etilgen», - dep atap ótti.