BUU-nyń arnaıy baıandamashysy jetkilikti turǵyn úı quqyǵyn júzege asyrýǵa Qazaqstan Úkimetiniń ázirligin atap kórsetti
BUU-nyń arnaıy baıandamashysy qyrkúıektiń 6-sy men 13-i aralyǵynda Qazaqstanǵa sapar jasady. Onyń saparynyń maqsaty - elimizdegi jetkilikti turǵyn úı quqyǵy men onymen baılanysty basqa quqyqtardyń júzege asyrylý jaǵdaıyna baǵa berý jáne sol týraly baıandama jasaý.
R. Rolnık hanym óz baıandamasynda, álemdik ekonomıka men qarjylyq daǵdarystyń jetkilikti turǵyn úı quqyǵyn júzege asyrýǵa tıgizgen áserine baǵa berdi. Ol sondaı-aq, áleýmettik turǵydan eń álsiz azamattardy, dálirek aıtqanda kirisi tómen otbasylardy, mıgranttar men az ult ókilderin qarjy daǵdarysynyń teris saldarlarynan qorǵaý jónindegi Úkimet tarapynan qabyldanǵan sharalarǵa taldaý júrgizdi.
«2007 jylǵy qarjy daǵdarysy halyqtyń áleýmettik turǵydan eń osal toptaryna jetkilikti baspanaǵa degen quqyqtaryn júzege asyrýǵa teris áserin tıgizdi. Halyqtyń jetkilikti turǵyn úıge degen quqyqtaryn tıimdi júzege asyrýǵa tıgizgen qarjy daǵdarysynyń áserin jumsartý maqsatynda respýblıka Úkimeti qabyldaǵan is-sharalardy aıtpaı kete almaıdy. Atap aıtqanda, Úkimet qurylystary toqtap qalǵan úılerdi aıaqtaý maqsatynda ulttyq qor qurdy. Sondaı-aq, azamattardyń ıpotekalyq nesıelerin qaıta qarjylandyrylýyn qamtamasyz etý týraly banktermen kelissózder júrgizdi, basqa da sharalar qabyldady. Osy saladaǵy máseleni sheshýde Úkimet úlken belsendilik tanytty», dep atap kórsetti R. Rolnık hanym.
Sapar barysynda jınaǵan málimetterdiń negizinde Rolnık hanym, 2011 jyldyń naýryz aıynda BUU-nyń Adam quqyqtary jónindegi keńesine tanystyratyn baıandama ázirleıdi.
