BUU-nyń teńizge shyǵa almaıtyn damýshy elder konferentsııasy Túrikmenstanda ótedi
AShHABAD. KAZINFORM – Túrikmenstannyń Syrtqy ister mınıstri Rashıd Meredov BUU Bas hatshysynyń orynbasary Rabab Fatımamen kezdesti, dep habarlaıdy Kazinform agenttiginiń tilshisi.
Kelissóz barysynda Rashıd Meredov Túrikmenstan Birikken Ulttar Uıymymen strategııalyq yntymaqtastyqty nyǵaıtýǵa nıetti ekenin bildirdi. Sonymen qosa, taraptar bıyl Ashhabadta ótetin BUU-nyń teńizge shyǵa almaıtyn damýshy elder konferentsııasyn joǵary deńgeıde uıymdastyrý máselesin talqylady.
— Taraptar atalǵan is-sharanyń álemdik arenadaǵy mańyzyna aıryqsha ekpin túsirdi. Konferentsııa bıyl ekinshi jartyjyldyqta ótedi. Onyń aıasynda birqatar mańyzdy qujattardy qabyldaý josparlanyp otyr, — delingen vedomstvonyń habarlamasynda.
Aıta keteıik, konferentsııaǵa teńizge shyǵa almaıtyn damýshy 32 eldiń ókilderi, onyń ishinde Ortalyq Azııa memleketteri qatysady. Іs-shara 10 jylda bir ret ótkiziledi.
Eń alǵashqy konferentsııa 2003 jyly Almaty qalasynda uıymdastyrylǵan. Buǵan qosa, Qazaqstan 2020-2021 jyldar aralyǵynda teńizge shyǵa almaıtyn damýshy elder tobyna tóraǵalyq etti.
