BUU-nyń mıssııalaryna qatysatyn áskerılerge tólemderdi aýdarý tetigi jeńildedi
ASTANA. KAZINFORM — Májilis depýtaty Oljas Quspekov búgin jalpy otyrysta qabyldanǵan áskerı qyzmetshilerdiń quqyqtaryn jetildirýge arnalǵan zańnyń jańa normalaryna qatysty túsinik berdi.
— Zańda birqatar ózgeris qamtyldy. Ózderińiz bilesizder, pandemııa kezinde qalanyń syrtynda turǵan blokposttarda turǵan áskerılerdi jergilikti atqarýshy organdar tarapynan tamaqtandyrý júzege asty. Bul is-sharalar zańnamada qarastyrylmaǵan edi. Endi engizilgen jańa norma boıynsha karantındik jaǵdaıda tamaqpen qamtamasyz etý memleket tarapynan ortalyqtandyrylǵan deńgeıde respýblıkalyq bıýdjetten uıymdastyrylmaq, — dedi Oljas Quspekov Parlament Májilisinde tilshiler suraǵyna jaýap bere otyryp.
Sonymen qatar ol shekara qyzmetinde júrgen áskerı azamattar tótenshe jaǵdaılarǵa jumyldyrylǵan kezde, olarǵa úsh eselengen aqshalaı tólem qarastyrylǵanyn aıtty.
— Qazaqstannyń Golan jotalaryna jiberilgen bitimgerlik mıssııasy bar. Olarǵa beriletin tólemdi BUU tarapy elimizdiń Qarjy mınıstrligine aýdaratyn. Odan keıin bul qarajat jarty jyl ishinde Qorǵanys mınıstrligine túskennen keıin ǵana sarbazdardyń esep-shotyna aýdarylatyn. Endi jańa norma aıasynda atalǵan qarajatty tikeleı Qorǵanys mınıstrligine túsiretin tártipti engizdik, — dedi depýtat.
Budan buryn habarlanǵandaı, Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine áskerı qyzmetshilerdiń quqyqtyq jaǵdaıyn jetildirý, qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» Zańy qabyldandy.
