BUU-nyń kıberqylmys týraly konventsııasyna qosylý nege mańyzdy
ASTANA. KAZINFORM — Qazaqstan Birikken Ulttar Uıymynyń kıberqylmysqa qarsy is-qımyl týraly konventsııasyna qosylýǵa daıyndalyp jatyr.
Qujatta kıberqylmyspen baılanysty uǵymdardyń anyqtamasy kórinis tapqan. Sondaı-aq konventsııaǵa qatysýshy memleketterdiń ıýrısdıktsııalyq ókilettikteri keńeıedi. Qujatty BUU Bas Assambleıasy 2024 jyldyń jeltoqsanyndaǵy № 79/243 qarar aıasynda qabyldap, tsıfrlyq tehnologııalardy qoldaný arqyly jasalǵan qylmystarǵa arnalǵan alǵashqy jan-jaqty halyqaralyq-quqyqtyq quraldy bekitken bolatyn.
Konventsııadaǵy erejeler aıasy tsıfrlyq keńistikke buzyp kirý, derekterge ruqsatsyz qol jetkizý sııaqty qalypty uǵymdardan áldeqaıda keń. Tipti aqparattyq-kommýnıkatsııalyq júıelerdi adam saýdasy, sybaılas jemqorlyq jáne terrorızmdi qarjylandyrý sııaqty aýyr qylmystarǵa septesý úshin paıdalaný uǵymdaryn qamtıdy. Tsıfrlyq tehnologııalar qylmystyń aýqymy men jyldamdyǵyn edáýir keńeıtkenin moıyndap otyr.
Konventsııadaǵy ereje boıynsha oǵan qosylǵan memleketter óz aýmaǵynda jasalǵan qylmystar boıynsha ǵana emes, óz azamattary men zańdy tulǵalary shetelde zardap shekken jaǵdaıda da is qozǵaı alady. Qujat túrli elderdiń quqyq qorǵaý organdary arasynda elektrondyq dáleldemelerdi saqtaý men almasýdyń jedeldetilgen rásimderin qarastyrady.
Konventsııada óz sheńberindegi búkil is-áreket adam quqyqtaryna, jeke ómirge qol suqpaý men pikir bildirý bostandyǵy qaǵıdatyn buzbaı júzege asyrylýy kerek ekeni basa aıtylǵan.
Qazaqstan osy konventsııaǵa qosylý arqyly kıberqylmyspen kúreste ózge memlekettermen tyǵyz yntymaqtastyq ornata alady. Sondaı-aq, tsıfrlyq dáleldemelermen jumys isteýdiń ulttyq tetikterin jetildirýge múmkindik alady. Konventsııaǵa qosylý ulttyq zańnamany kıberqaýipsizdik pen quqyq qoldaný salasyndaǵy halyqaralyq standarttarǵa beıimdeýdi talap etýi múmkin.
Buǵan deıin BUU-nyń atalmysh konventsııasyna 65 el qol qoıǵanyn jazǵan edik.