BUU-nyń kelesi Bas hatshysy laýazymyna taǵy eki kandıdat usynyldy
ASTANA. KAZINFORM — BUU Bas Assambleıasy tóraǵasynyń resmı saıtynda jarııalanǵan qujattarǵa sáıkes, álemdik uıymnyń kelesi bas hatshysy laýazymyna taǵy eki kandıdat usynyldy, dep habarlaıdy Sınhýa.
Qazirgi ýaqytta Afrıka Odaǵyna tóraǵalyq etetin Býrýndı Senegaldyń burynǵy prezıdenti Makı Salldy, al Kosta-Rıka ekonomıst, burynǵy vıtse-prezıdent Rebeka Grınspendi usyndy.
Osymen Bas hatshy laýazymyna úmitker tórt kandıdat bar. Buǵan deıin Chılı, Brazılııa jáne Meksıka usynǵan Chılıdiń burynǵy prezıdenti Mıshel Bachelet jáne Argentına usynǵan Atom energııasy jónindegi halyqaralyq agenttiktiń (MAGATE) qazirgi bas dırektory Rafael Grossı úmitker retinde tirkelgen bolatyn.
BUU Bas Assambleıasynyń tóraǵasy Annalena Berbok BUU-ǵa múshe memleketterge joldaǵan hatynda 20 sáýirde bastap bir aptaǵa josparlanǵan úmitkerlermen ınteraktıvti dıalog júrgizý tártibin jarııalady.
Dıalogtar BUU-nyń úsh negizgi tiregi tóńireginde qurylady: beıbitshilik pen qaýipsizdik, adam quqyqtary jáne damý. Hatqa sáıkes, árbir úmitker óz kózqarasyn usynyp, odan keıin múshe memleketter suraqtar qoıyp, talqylaýǵa qatysady.
Sondaı-aq hatta úmitkerler qatysýǵa quqyly bolýy úshin ınteraktıvti dıalogtar bastalǵanǵa deıin jáne 1 sáýirden keshiktirmeı usynylýy kerektigi atap ótilgen.
Eske sala keteıik, BUU jańa Bas hatshyny saılaý protsesin bastady. Uıymnyń qazirgi Bas hatshysy Antonıý Gýterrıshtiń mandaty 2026 jyldyń 31 jeltoqsanynda aıaqtalady.
