BUU-nyń Qazaqstannyń bitimgerlerine aýdaratyn tólemi qansha
ASTANA. KAZINFORM — QR Qorǵanys mınıstriniń orynbasary Darhan Ahmedıev BUU tarapynan bitimgerlerge bólinetin jalaqynyń somasy qaı deńgeıde ekenin aıtty.
Onyń aıtýynsha, qazir BUU bitimgershilik mıssııalarynda 155 áskerı qyzmet etip júr.
— BUU-nyń bir sarbazǵa bólgen qarajaty 1500 AQSh dollary. Bizdiń jalaqymen salystyrǵanda, bul soma úsh ese kóp, — dedi Darhan Ahmedıev Májilistiń jalpy otyrysynda.
Sonymen qatar ol áskerılerge arnalǵan tólemdi aýdarý protsesi jedeldetilgenin aıtty.
— Buǵan deıin BUU tólemdi Qarjy mınıstrligine aýdaratyn. Bul qarajat biraz ýatyttan soń Qorǵanys mınıstrligine, sosyn áskerı qyzmetshilerge tólem retinde jiberiletin. Endi jańa norma aıasynda bul tólem Qorǵanys mınıstrligine tikeleı aýdarylady, — dep túsindirdi mınıstrdiń orynbasary.
Budan buryn habarlanǵandaı, qazir 150-den astam qazaqstandyq bitimger Birikken Ulttar Uıymynyń Taıaý Shyǵystaǵy jáne Afrıka kontınentindegi 7 mıssııasyna áskerı baqylaýshy, shtabtyq ofıtser jáne jeke derbes áskerı kontıngent retinde qatysyp jatyr.
Búgin Májilis qabyldaǵan zań aıasynda BUU-nyń mıssııalaryna qatysatyn áskerılerge tólemderdi aýdarý tetigi jeńildedi.
Eske salsaq, byltyr Qorǵanys mınıstrligi qazaqstandyq bitimgerlerge qaı somada ótemaqy qarastyrylǵanyn aıtqan edi.
