BUU-nyń 144-sessııasynda Qazaqstan qandaı reformalar usyndy
JENEVA. KAZINFORM – Jenevada BUU Adam quqyqtary jónindegi komıtetiniń 144-sessııasy aıasynda Qazaqstannyń Azamattyq jáne saıası quqyqtar týraly halyqaralyq paktti júzege asyrý boıynsha Úshinshi ulttyq baıandamasy talqylandy. Bul týraly QR Mádenıet jáne aqparat mınıstrligi málim etti.
Qazaqstan tarapynan sońǵy jyldardaǵy negizgi reformalar usynyldy. Halyqaralyq alańda QR Mádenıet jáne aqparat vıtse-mınıstri Evgenıı Kochetov bastaǵan delegatsııa qatysty. Ol genderlik zańnamany jetildirý jumystary týraly aıtyp, áıelder quqyqtaryn qorǵaý memlekettik saıasattyń basym baǵyttarynyń biri ekenin sóz qozǵady.
Vedomstvonyń málimetinshe, BUU-nyń 144-sessııasynda Qazaqstan turmystyq zorlyq-zombylyq jasaǵandardy qylmystyq jaýapkershilikke tartý, «Mass medıa týraly» zań, jastar men áıelderge arnalǵan kvotalar syndy reformalar usyndy.
Atap aıtsaq, áıelderge 30% kvota engizildi. Búginde memlekettik qyzmette 55,8%-y áıelder eńbek etedi, Parlamenttegi úlesi — 19,6%. Genderlik saraptama engizildi, sondaı-aq elde genderlik baǵdarlanǵan bıýdjetti josparlaý máselesi qarastyrylyp jatyr. Sońǵy jyldardaǵy basty reformalardyń biri – turmystyq zorlyq-zombylyq jasaǵandardy qylmystyq jaýapkershilikke tartý.
Qazaqstan bul zańdy qatańdatyp qana qoımaı, aldyn alý sharalaryn da engizdi. Otbasyn qoldaý ortalyqtarynyń jumysy ońtaılandyrylyp, júıelendi, qıyn ómirlik jaǵdaıǵa tap bolǵan otbasylardy anyqtaıtyn mobıldi toptar quryldy, agressorǵa qatysty mindetti psıhologııalyq sharalar engizildi. E. Kochetov sóz bostandyǵy men azamattyq qoǵamdy qoldaý máselesin de atap ótti.
«Mass medıa týraly» jáne «Onlaın platformalar týraly» zańdar qabyldandy, jala jabý qylmystyq is bolyp eseptelmeıdi sonymen qatar epetition.kz platformasy iske qosyldy. Qazaqstanda 17 myńnan astam úkimettik emes uıym jumys isteıdi.
Aıta ketý kerek, azamattyq qoǵamnyń belsendiligi komıtet tarapynan erekshe atap ótildi. Qazaqstan adam quqyqtary salasyndaǵy standarttardy nyǵatý jáne ashyq dıalogqa daıyn ekenin rastady.
Eske sala keteıik, buǵan deıin Mádenıet jáne aqparat mınıstri Aıda Balaeva Prezıdenttiń «Taza Qazaqstan» bastamasyn júzege asyrý sharalary týraly aıtyp bergen edi.