BUU-ny nyǵaıtý kerek, onyń ornyn basatyn uıym joq - QR Prezıdenti
ASTANA. KAZINFORM - Memleket basshysy Astana Think Tank forýmynyń plenarlyq otyrysyna qatysýda, dep habarlaıdy Aqordanyń baspasóz qyzmeti.
Jıyn sońynda Memleket basshysy forým qatysýshylarynyń saýaldaryna jaýap berdi.
Plenarlyq otyrystyń moderatory, Berlin Global Dialogue tóraǵasy Lars-Hendrık Reller Prezıdentten Qazaqstannyń óńirdegi róli týraly, sondaı-aq aımaqtyq yntymaqtastyq arqyly orta derjavalardyń ustanymdaryn tıimdirek paıdalaný turǵysynan qandaı problemalar bar ekenin surady.
– Eń aldymen, biz aımaqtyq saıasatqa, Ortalyq Azııadaǵy barlyq jaqyn kórshilerimizben tyǵyz yqpaldastyqqa beıil ekenimizdi atap ótkim keledi. Biz yntymaqtastyqty tereńdetken saıyn, Qazaqstan men Ortalyq Azııanyń basqa da elderiniń múddeleri úshin jaqsy bolmaq. Qazirgi jaǵdaıdy on jyl burynǵy ahýalmen salystyrýǵa kelmeıdi, múlde ózgeshe. Búginde biz belsendi yntymaqtastyqty damytyp kelemiz, aýqymy keń máseleler boıynsha sanqyrly baılanys ornatyldy. Ortalyq Azııa memleketteriniń basshylary jıi kezdesedi. Ortaq máselelerdi birlese pysyqtaıdy. Bul basqosýlardyń nátıjesi mol. Sondyqtan meniń jaýabym aıqyn. Bizdiń saıası ustanymdarymyz strategııalyq tepe-teńdikti nyǵaıtýǵa baǵyttalǵan. Menińshe, Ortalyq Azııanyń álem kartasyndaǵy orny erekshelenip keledi. Meniń aımaqtaǵy áriptesterim munymen kelisedi dep oılaımyn. Biz osy óte mańyzdy óńirdiń áleýetin nyǵaıtý úshin qoldan kelgenniń bárin jasaımyz.
Birikken Ulttar Uıymyna keletin bolsaq, men ony nyǵaıtý kerek degen senimdemin. Óıtkeni onyń ornyn basatyn uıym joq. BUU-da kóptegen kemshilik bolǵanymen, bizde basqa balama joq. Sondyqtan Qazaqstan BUU rólin nyǵaıtý boıynsha osyndaı ustanymdaǵy barlyq elmen yntymaqtasa berýge nıetti. Aımaqtyq derjavalar men orta derjavalardyń úni, eń aldymen, Qaýipsizdik Keńesinde estilýge tıis. Qaýipsizdik Keńesi de reformaǵa muqtaj. Óıtkeni ol, ókinishke qaraı, tyǵyryqqa tireldi. Al odan shyǵýdyń jolyn bárimiz birlesip tabýymyz kerek. Biz kelesi jyly 80 jyldyǵyn atap ótetin Birikken Ulttar Uıymyna qoldaý kórsetýimiz qajet, – dedi Qasym-Jomart Toqaev.
