BUU Nepaldaǵy sý tasqynynan zardap shekkenderge kómek kórsetý úshin 49,6 mln dollar surady

Qarajat búlingen sýmen jabdyqtaý júıelerin qalpyna keltirýge, sýdy jedel tazartý júıelerin ornatýǵa jáne aýrýlardyń taralýyna jol bermeý úshin turǵyndardy gıgıenalyq quraldarmen qamtamasyz etýge baǵyttalmaq.

Tórt aıǵa arnalǵan tótenshe jaǵdaıǵa den qoıý jospary Nepaldyń Tabıǵı apattar qaýpin azaıtý jáne olardy basqarý jónindegi ulttyq basqarmasynyń (NDRRMA) jetekshiligimen júzege asyrylady. Baǵdarlama úkimet anyqtaǵan gýmanıtarlyq kómek kórsetýdegi olqylyqtardy joıýǵa baǵyttalǵan.

Sonymen qatar jospar qys mezgilinde Gımalaıdyń bıik taýly eldi mekenderindegi jaǵdaıdyń odan ári nasharlaýyna jáne juqpaly aýrýlardyń taralýyna jol bermeýdi kózdeıdi. Gýmanıtarlyq toptar jalǵasyp jatqan tótenshe jaǵdaı operatsııasyna qatysatyn qurylymdarmen birlesip jumys istep jatyr.

– Otbasylar jaqyndarynan, úılerinen jáne kúnkóris kózderinen aıyryldy. Qazir zardap shekken adamdarǵa ómirlik mańyzy bar kómekti ýaqytyly jetkizý asa mańyzdy, – dedi BUU-nyń Nepaldaǵy turaqty úılestirýshisi Lıla Pıters ıAhıa.

BUU málimetinshe, 26 tamyzda bastalǵan tabıǵı apat saldarynan myńnan astam adam qaza tapqan, kóptegen turǵyn áli iz-túzsiz joǵalǵandar qatarynda.

Rasýva, Nývakot jáne Dhadıng aýdandaryndaǵy tutas aýyldardyń turǵyndary úılerin tastap ketýge májbúr boldy.

Tabıǵı apat ınfraqurylymǵa aıtarlyqtaı zalal keltirdi. Birqatar kólik joly jabylyp, elektr energııasyn berý júıesinde úzilister paıda boldy. Sýmen jabdyqtaý jáne sanıtarııa júıeleri de búlingen. Syrtqy álemmen baılanysy úzilgen eldi mekenderde birinshi kezekte qajetti zattar tapshy.

Sońǵy málimet boıynsha, Nepaldyń Qytaımen shekarasyna jaqyn Rasýva aýdany men oǵan irgeles óńirlerdegi sý tasqynynan qaza tapqandar sany 1294 adamǵa jetken. Sonymen qatar 22 myń bala shuǵyl túrde aýyzsýǵa muqtaj.

Aıta keteıik, BUU aptap ystyq pen tabıǵı apattar kúsheıýi múmkin ekenin eskertti.