BUU Mıanmaǵa kómek retinde 5 mıllıon dollar bóldi
ASTANA. KAZINFORM — Birikken Ulttar Uıymy juma kúni Mıanmaǵa jer silkinisinen keıingi zardap shekkenderge kómek kórsetý úshin 5 mıllıon AQSh dollaryn bóldi. Sondaı-aq qosymsha qajettilikterdi anyqtaý jáne jaýaptardy úılestirý boıynsha jumys júrgizip jatyr, dep jazdy Sınhýa BUU Bas hatshysynyń ókili Stefan Dıýjarrıkke silteme jasap.
— Birikken Ulttar Uıymy zardap shekkender sany, ınfraqurylymnyń zaqymdanýy jáne shuǵyl gýmanıtarlyq qajettilikter týraly aqparat jınap jatyr, — dedi Dıýjarrık jýrnalısterge.
Mıanma memlekettik ákimshilik keńesiniń málimeti boıynsha, juma kúngi 7,7 balldyq jer silkinisinen qaza tapqandar sany myńnan asyp ketti. S. Dıýjarrık Mıanma bıligi halyqaralyq qaýymdastyqty apat saldaryn joıýǵa baǵyttalǵan kúsh-jigerdi qoldaýǵa shaqyrǵanyn aıtty.
Birikken Ulttar Uıymynyń Tótenshe kómek kórsetý jónindegi úılestirýshisi Tom Fletcher adam ómirin saqtap qalýǵa kómek kórsetý úshin BUU Tótenshe jaǵdaıǵa qarsy áreket etý ortalyq qorynan 5 mıllıon AQSh dollaryn bólýdi buıyrdy.
S.Dıýjarrık jer silkinisi Mıanmanyń ortalyq aımaqtaryna, epıtsentrge jaqyn ornalasqan Mandalaı qalasyna, sondaı-aq Neıpıtaý, Bago, Magveı, Sagaıng, Shan shtaty jáne múmkin basqa aýdandarǵa aıtarlyqtaı zııan keltirgenin aıtty.
— Jer silkinisinen Mıanmadan ózge, Taıland ta zardap shekti, — dedi ol.
Bangkokta kópqabatty úı qulap, zardap shekkender bar. Qalada tótenshe jaǵdaı jarııalandy jáne úkimet áreketti kúsheıtip jatyr.
S.Dıýjarrık kúshti jer asty dúmpýleri Qytaıdyń Mıanmamen shektesetin ıÝnnan provıntsııasynda da tirkelgenin aıtty. Aldyn ala málimet boıynsha, provıntsııada azdaǵan qıraýlar bar.
— Sonymen qatar jer asty dúmpýleri Bangladeshtiń birneshe qalasynda, sonyń ishinde Dakka men Chıttagongta dúrbeleń týdyrdy. Zardap shekkender týraly aqparat túspegenimen, bılik oryndary yqtımal after silkinisterge daıyn boldy, — dedi S. Dıýjarrık.
BUU Bas hatshysynyń ókili álemdik uıym jaǵdaıdy jiti baqylap, qajet bolǵan jaǵdaıda qoldaý men kómek kórsetýdi jalǵastyratynyn aıtty.
Aıta keteıik, Mıanmadaǵy jer silkinisine baılanysty EO kómekke 2,5 mıllıon eýro bóldi.
Mıanmada jer silkinisi saldarynan tótenshe jaǵdaı jarııalandy.