BUU mıssııasyna baǵyttalatyn Qazaqstan bitimgerleri birneshe tildi meńgergen - Talǵat Muhtarov

ASTANA. QazAqparat - «Qazpolk» BUU standarttarymen daıyndyqtan ótti. Bul týraly Ortalyq kommýnıkatsııalar qyzmetindegi baspasóz máslıhatynda Qorǵanys mınıstriniń orynbasary Talǵat Muhtarov málim etti, dep habarlaıdy QazAqparat.

«Ústimizdegi jylǵy 15 maýsymda elimizdiń Parlamenti QR Konstıtýtsııasynyń 53-babyna sáıkes, 40 adamǵa deıin áskerı baqylaýshylar men shtab ofıtserlerin BUU-nyń birqatar bitimgershilik mıssııalaryna jiberý sheshimin jasady. Sonymen qatar 120 adamǵa deıingi bitimgershilik rotany Lıvandaǵy BUU-nyń Ýaqytsha Kúshteriniń quramyna jiberý jolymen beıbitshilik pen qaýipsizdikti qoldaý jónindegi halyqaralyq mindettemelerdi oryndaý úshin QR Qarýly Kúshteriniń áskerı qyzmetshilerin baǵyttaý týraly sheshim qabyldady», - dedi T. Muhtarov.

Onyń sózine qaraǵanda, búginde «Qazpolk» BUU standarttarymen daıyndyqtan ótti.

«Qazpolk» áskerı qyzmetshileri aǵylshyn, túrik, nemis jáne arab tilderin emin-erkin meńgergen. Sonymen birge, teorııalyq jáne tájirıbelik daıyndyqtary túrli baıqaýlar, semınarlar men oqý-jattyǵýlarmen shyńdaldy. Bul sharalar Qazaqstannan bólek AQSh, Ulybrıtanııa, Túrkııa, Germanııa, Frantsııa, Úndistan, Pákistan jáne basqa da elderde uıymdastyryldy», - dedi Muhtarov.

Budan buryn habarlanǵandaı, bıylǵy 15 maýsymda Parlament Prezıdenttiń 40 ofıtserdi BUU mıssııasyna jiberý týraly usynysyn qoldady.

Qazaqstannyń 120-ǵa jýyq áskerı qyzmetshisi Lıvandaǵy mıssııaǵa qatysady.

BUU mıssııasynda Qazaqstan bitimgerlerine tólenetin eńbekaqy mólsheri belgili boldy.