BUU mıssııasy: Golan jotalaryna attanatyn úshinshi ulttyq bitimgerlik kontıngent tolyq daıyn
ASTANA. KAZINFORM — Almatyǵa jumys sapary barysynda Qorǵanys mınıstri avıatsııa general-leıtenanty Dáýren Qosanov BUU-nyń Golan jotalaryndaǵy mıssııasyna barýǵa daıyndalyp jatqan 3-shi ulttyq bitimgerlik kontıngenttiń áskerı qyzmetshilerimen kezdesti. Bul týraly vedomstvonyń baspasóz qyzmeti málim etti.
Bólimshe komandıri podpolkovnık Іlııas Almatov jeke quramnyń qoıylǵan mindetterdi oryndaýǵa ázirligi týraly baıandady.
— Daıyndyq halyqaralyq standarttarǵa saı júrgizilýde. Jeke quram mıssııa aımaǵyna attanýǵa tolyq daıyn, — dedi ol. Áskerı qyzmetshilerge arnaǵan sózinde qorǵanys mınıstri aldaǵy mıssııanyń mańyzdylyǵyn atap ótti. — Bitimgerlik operatsııaǵa qatysý — úlken mártebe ári zor jaýapkershilik. Qazaqstandyq kontıngent el basshylyǵy men BUU mıssııasy qolbasshylyǵynyń senimi men qurmetine ıe. Sizder elimizdi laıyqty túrde tanytasyzdar dep senemin, — dedi avıatsııa general-leıtenanty Dáýren Qosanov.
Mınıstr sondaı-aq jaýapkershilik aımaǵyndaǵy turaqtylyq pen qaýipsizdikti qamtamasyz etýge qazaqstandyq bitimgerlerdiń qosqan úlesin atap ótti.
Sol kúni Armııa úıinde «Qazaqstan GAJ ortalyǵy» AQ basqarýshy dırektory Nurken Erjanov mınıstrge Defence Tech keńsesin tanystyrdy. Bul – qorǵanys salasyna arnalǵan kópfýnktsıonaldy ınnovatsııalyq hab. Atalmysh ortalyq qorǵanys salasyna qajetti perspektıvaly ázirlemelerdi izdeý jáne irikteý, ıdeıadan bastap prototıp jasaýǵa jáne pılottyq jobaǵa engizýge deıin qoldaýmen aınalysady. Sonymen qatar Qorǵanys mınıstrliginiń vedomstvolyq uıymdarymen, ǵylymı qaýymdastyqpen jáne startap-ekojúıemen ózara is-áreketti qamtamasyz etedi.
Aıta keteıik, BUU Qazaqstanǵa bitimgerlik mıssııaǵa jylyna 5 mln dollar tólem jasaıdy.