BUU men Qazaqstannyń seriktestik tarıhy Elbasy esimimen tyǵyz baılanysty - Natalıa German

NUR-SULTAN. QazAqparat - Qazaqstan men Birikken Ulttar Uıymynyń jemisti ári tıimdi seriktestik tarıhy Nursultan Nazarbaevtyń esimimen tyǵyz baılanysty. Bul týraly BUU Bas hatshysynyń arnaýly ókili, Ortalyq Azııadaǵy Preventıvti dıplomatııa jónindegi óńirlik ortalyqtyń basshysy Natalıa German aıtty, dep habarlaıdy QazAqparat tilshisi.

«Ózderińiz bilesizder, Qazaqstan 1992 jyldyń maýsymynda BUU-ǵa múshe boldy. Sol ýaqyttan beri Qazaqstan Respýblıkasynyń Birikken Ulttar Uıymymen jemisti ári tıimdi seriktestiginiń tarıhy Nursultan Nazarbaevtyń esimimen tyǵyz baılanysty. Sizderdiń elderińiz jańa táýelsiz memleket retinde jumysyna tolyqqandy qatysqan BUU Bas assambleıasynyń alǵashqy sessııasy - 1992 jylǵy 47-sessııa barysynda Prezıdent Nazarbaev birinshi ret sóz sóılegen edi. Sodan keıingi jyldary Nursultan Nazarbaev BUU shtap-páterine onnan astam ret sapar jasap, joǵary deńgeıdegi jalpy saıası pikirtalastarǵa qatysty. Onyń bastamasymen BUU alańynda óte mańyzdy soǵysqa qatysty, ıadrolyq qarýǵa qarsy jáne terrorızmge qarsy kópten usynys tabysty júzege asyryldy», - dedi ol «Nursultan Nazarbaev. Jaýapty basshylyq: Sabaqtastyq pen evolıýtsııa» taqyrybyndaǵy halyqaralyq konferentsııa barysynda.

Onyń atap ótýinshe, 2011 jyldyń naýryzynda Qasym-Jomart Toqaevtyń BUU Bas hatshysynyń orynbasary laýazymyna taǵaıyndalýy Qazaqstannyń BUU mıssııasyn ilgeriletýdegi salmaqty úlesiniń moıyndalýy boldy.

«Qazaqstannyń BUU Qaýipsizdik keńesiniń turaqty emes múshesi bolyp saılanýy bizdiń yntymaqtastyq tarıhymyzdaǵy úlken oqıǵa boldy. BUU bas organdarynyń birine sizderdiń elderimiz múshe bolǵan kezeńde QR Tuńǵysh Prezıdenti Nursultan Nazarbaev kelesi basymdyqtardy aıqyndady: ıadrolyq qarýdan azamat álem qurý, jahandyq soǵys qaterin joıý jáne óńirlik janjaldardy retteý, óńirlik qaýipsizdik pen yntymaqtastyqty nyǵaıtý, terrorızmmen kúres, qaýipsiz ári turaqty damý arasyndaǵy úzdiksiz baılanysty qamtamasyz etý, sonymen qatar BUU Qaýipsizdik keńesi men barlyq júıesin HHІ ǵasyrdaǵy syn-tegeýrinderge beıimdeý», - dedi Natalıa German.