BUU men Qazaqstan ózara yntymaqtastyqtyń ekinshi kezeńine ótti - Djeren Gıýres
ASTANA. KAZINFORM – Búgin QR Premer-mınıstriniń orynbasary – Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva «BUU-Áıelder» qurylymynyń Ortalyq Azııa boıynsha úılestirý keńsesiniń basshysy ári Qazaqstandaǵy Eldik keńse ókili Djeren Gıýven Gıýrespen kezdesti.
Mádenıet mınıstrligi baspasóz qyzmetiniń habarlaýynsha, kezdesý barysynda taraptar genderlik teńdik, áıelder quqyqtary men múmkindikterin keńeıtý, otbasy ınstıtýtyn nyǵaıtý jáne áıelder men balalar quqyǵyn qorǵaý salalaryndaǵy yntymaqtastyqtyń qazirgi jaǵdaıy men bolashaǵyn talqylady.
Qazaqstanda júrgizilip jatqan reformalarǵa, onyń ishinde jańa Konstıtýtsııany qabyldaý máselesi boıynsha aldaǵy respýblıkalyq referendýmǵa erekshe nazar aýdaryldy. Aıda Balaeva Ata zań jobasynda otbasy ınstıtýtyn nyǵaıtý, áıelder men erler úshin teń múmkindik jasaý, sondaı-aq ana, áke jáne balalardy qorǵaý normalary qarastyrylǵanyn atap ótti.
- Konstıtýtsııada alǵash ret dástúrli otbasy ınstıtýtyn qoldaý maqsatynda neke teń quqyqty er men áıel odaǵy retinde aıqyn bekitilmek. Bul dástúrli otbasylyq qundylyqtardy nyǵaıtýǵa áser etedi. Qazaqstan úshin bul másele asa mańyzdy. Áńgime tek mádenı jáne tarıhı dástúrlerdi saqtaý týraly ǵana emes, sonymen birge keń aýqymdy saıası jáne ekonomıkalyq aspektiler jaıynda bolyp otyr. Elimizdiń aýmaǵy keń, al halyq tyǵyzdyǵy tómen bolǵandyqtan, otbasy ınstıtýtyn nyǵaıtý memlekettiń turaqty damýyna tikeleı áser etedi, – dep atap ótti Aıda Balaeva.
Jıynda Djeren Gıýven Gıýres eldegi genderlik saıasat salasyndaǵy oń ózgeristerge toqtaldy.
Onyń aıtýynsha, qazirgi kezde BUU men Qazaqstan ózara yntymaqtastyqtyń ekinshi kezeńine ótti. Sondaı-aq kezdesýde «BUU-Áıelder» sarapshylaryn osy jumysqa tartý máselesi de sóz etildi.
Kezdesý qorytyndysy boıynsha taraptar genderlik saıasat pen turaqty damý salalarynda naqty nátıje kútiletin jumystardy jalǵastyrýǵa kelisti.
Osyan deıin álem jáne Qazaqstan saıasatyndaǵy áıelderdiń róli týraly jazdyq.