BUU-men baılanysta jańa qadam: Qazaqstan mańyzdy konventsııaǵa qosyldy

Birikken Ulttar Uıymynyń Hatshylyǵy Qazaqstan Respýblıkasynyń Mamandandyrylǵan mekemelerdiń artyqshylyqtary men ımmýnıtetteri týraly 1947 jylǵy 21 qarashadaǵy konventsııaǵa qosylýy rásimderiniń aıaqtalǵany týraly habardar etti.

— Konventsııa halyqaralyq uıymdardyń derbestigin qamtamasyz etýge arnalǵan biryńǵaı quqyqtyq negizdi bekitip, bul mekemelerdiń qyzmetine, múlkine jáne qyzmetkerlerine dıplomatııalyq mártebe men ımmýnıtet kepildigin beredi, — delingen habarlamada.

Qazaqstannyń Konventsııaǵa qosylýy BUU-nyń mamandandyrylǵan mekemeleriniń qyzmeti úshin quqyqtyq negiz qalyptastyryp, BUU júıesimen yntymaqtastyqty nyǵaıtýǵa jalpy oń áser etedi.

— Atap aıtqanda, qujatqa qosylý BUU mekemeleriniń baǵdarlamalyq qyzmet aýqymynyń, qarjylandyrýy men qyzmetkerler sanynyń artýyna yqpal etedi, sondaı-aq atalǵan BUU mamandandyrylǵan mekemeleriniń Qazaqstan aýmaǵynda jumys isteýine, elimizde qysqa merzimdik halyqaralyq is-sharalaryn (semınar, konferentsııa, sımpozıým jáne t. b.) ótkizýine quqyqtyq múmkindikterdi arttyrady, — dep túsindirdi vedomstvonyń baspasóz qyzmeti.

Qazaqstan BUU júıesiniń qurylymdarymen ornyqty damý, beıbitshilik pen qaýipsizdik, sondaı-aq adam quqyqtaryn qorǵaý salasyn qamtıtyn keń aýqymdy baǵyttar boıynsha belsendi yntymaqtyqty júzege asyrady. Atap aıtqanda, elde BUU-nyń birqatar mamandyrylǵan mekemeleriniń, onyń ishinde DDU, FAO, HEU jáne ıÝNESKO-nyń eldik jáne óńirlik ókildikteri jumys isteıdi.

Qazaqstan kópjaqty yntymaqtastyqty nyǵaıtýǵa jáne Uıymnyń Ortalyq Azııadaǵy óńirlik qatysýynyń tıimdiligin arttyrýǵa erekshe mán beredi. Bul rette, 2026 jyly QR tarapy Almaty qalasynda Ortalyq Azııa men Aýǵanstan úshin ornyqty damý maqsattary jónindegi BUU óńirlik ortalyǵynyń jumys isteýi úshin negiz qalaýshy qujattardy ratıfıkatsııalaýdy aıaqtady.

Buǵan deıin BUU álemge tóngen negizgi jahandyq qaýipterdi atady.