BUU Lıvandaǵy bitimgerlik mıssııasyn aıaqtamaqshy

ASTANA. KAZINFORM – Birikken Ulttar Uıymynyń (BUU) Lıvannyń ońtústigindegi «kógildir syzyq» degen ataýmen belgili Izraıl men Lıvan arasyn bólip turǵan aımaqty patrýldeıtin bitimgerlik mıssııasy 2026 jyly óz qyzmetin aıaqtaıdy. BUU-nyń Qaýipsizdik Keńesi 28 tamyz kúni Nıý-Iorkte osyndaı sheshim qabyldady, dep habarlaıdy DW.

BUU Qaýipsizdik Keńesi bitimgerlik mıssııasynyń mandatyn 2026 jyldyń 31 jeltoqsanyna deıin jalǵastyrýǵa biraýyzdan daýys berdi. Bul uıym mıssııasy tarıhyndaǵy sońǵy merzim.

- Merzim aıaqtalysymen BUU ókilderi Lıvan úkimetimen tyǵyz baılanysa otyryp mıssııa qyzmetkerleriniń sanyn birtindep qysqarta beredi, -delingen negizi qararda.

- Bitimgerlik mıssııanyń elden shyǵýy jyl boıyna jalǵasady-, dep naqtylady BUU ókilderi.

Izraıl mıssııanyń bul áreketin synǵa aldy

BUU-nyń Lıvandaǵy ýaqytsha kúshteri elde 1978 jyldan beri áreket etip jatyr jáne onda olardyń 10 myńnan astam áskeri men azamattary bar. Mıssııa Izraıl men Lıvan arasynda býfer qyzmetin atqarýy kerek bolatyn.

Lıvandyq sheıitterdiń radıkaldy «Hezbollah» qozǵalysy men Izraıl arasynda bolǵan soǵystan soń 2006 jyly bitimgerlerdiń mıssııasy BUU Qaýipsizdik Keńesiniń qarary aıasynda aıtarlyqtaı keńeıtildi.

Osy qararǵa sáıkes, Izraılmen shekaralas aımaqta bitimgershilik kúshteri men Lıvan áskeri turýy qajet edi. Alaıda bul jerde «Hezbollah» ókilderi de júrdi. Osyǵan qaraı Izraıl mıssııany óz mindetin talapqa saı oryndamady dep aıyptady, dep jazady AFP.

Osyǵan deıin Lıvannyń Izraılmen shekarada ásker sanyn 10 myńǵa deıin kóbeıtkeli otyrǵany týraly jazdyq.