BUU Latyn Amerıka men Karıb basseınin pandemııa oshaǵy dep atady
NЬıÝ-IORK. QazAqparat – COVID-19 pandemııasy oshaqtarynyń biri Latyn Amerıka men Karıb basseıni aımaǵy bolyp otyr. Munda áleýmettik teńsizdik artyp, beıresmı jumyspen qamtý deńgeıi joǵary. Óńirde medıtsına barshaǵa qoljetimdi emes. Densaýlyq saqtaý organdarynyń jumysy barlyq jerde jolǵa qoıylmaǵan. Bul týraly BUU Bas hatshysy Antonıý Gýterrısh málimdedi. Ol kedeılerge, múgedekterge, qarttarǵa, áıelderge, baıyrǵy halyqtardyń ókilderine, mıgrant bosqyndarǵa eń úlken qaýip tónip turǵanyn eskertti. QazAqparat bul týraly BUU Jańalyqtar ortalyǵyna silteme jasap.
BUU Latyn Amerıka men Karıb basseınindegi pandemııanyń jaǵdaıy týraly analıtıkalyq málimet usyndy. Onda COVID-19 indetin toqtatý jáne daǵdarysty sátti eńserý týraly usynymdar berilgen. Qujatta teńsizdikpen kúres júrgizilmese jáne halyqaralyq kómek bolmasa óńir elderi kúızelisterge tótep bere almaıtyny aıtylǵan.
«Qazirdiń ózinde kúshti teńsizdik, beıresmı jumyspen qamtýdyń joǵary deńgeıi jáne medıtsınalyq qyzmetterdiń fragmenttelýi jaǵdaıynda halyqtyń eń osal toptary óte qıyn jaǵdaıǵa tap bolyp otyr», - dedi BUU basshysy Nıý-Iorktegi vırtýaldy brıfıng barysynda.
Pandemııaǵa baılanysty óńirde kedeılik deńgeıi 7 paıyzǵa artady, osylaısha 230 mıllıon adam kedeıler sanatynda, al 96 mıllıon adam qaıyrshylar sanatynda bolady. Jumyspen qamtý deńgeıi 8 paıyzdan astamǵa tómendeıdi. 44 mıllıon adam jumyssyz qalady. Nátıjesinde teńsizdik odan ári tereńdep, nasharlaıdy. Bul Latyn Amerıka men Karıb basseıni elderinde medıtsınalyq saqtandyrýǵa tabysy tómen adamdardyń 32 paıyzy ǵana ıe.
«Biz vırýstyń taralýyn tejeý jáne barlyq adamnyń ómiri men densaýlyǵy úshin kúresti kúsheıtý maqsatynda qoldan kelgenniń bárin jasaýymyz kerek. Biraq biz buryn-sońdy bolmaǵan áleýmettik-ekonomıkalyq saldarǵa qatysty sharalar qabyldaýǵa tıispiz», - dep atap ótti Bas hatshy.
BUU Bas hatshysy Latyn Amerıka men Karıb basseıniniń halyqtaryna osyndaı qıyn kezeńde tolyq qoldaý kórsetetinin málimdedi. Olardy yntymaqtastyq pen janashyrlyq qaǵıdalaryn basshylyqqa alýǵa shaqyrdy. BUU basshysy «biz osy daǵdarysty birge eńsere alamyz» jáne árkim ózin jaıly sezinetin jańa qoǵam qura alamyz dep sendirdi.
