BUU qurǵaqshylyq saldary aýqymdy bolatynyn eskertedi
ASTANA.KAZINFORM — Klımattyń ózgerýine jáne jer men sý resýrstaryna júktemeniń artýyna baılanysty 2023 jyldan beri búkil álemde qurǵaqshylyq jaılady. Bul týraly BUU daıyndaǵan jańa baıandamada aıtylǵan, dep habarlaıdy Kazinform.
«Álemdegi qurǵaqshylyq oshaqtary, 2023-2025» baıandamasy qurǵaqshylyqtyń kedeılik, ashtyq, energetıkalyq turaqsyzdyq jáne ekojúıe degradatsııasyn qalaı kúsheıtetinin jan-jaqty taldaý.
— Qurǵaqshylyq — tilsiz jaý. Ol jasyryn túrde resýrsty sarqyp, tirshilikti baıaý qarqynmen buzady. Onyń saldary uzaqqa sozylady, — dep atap ótti BUU shóleıttenýge qarsy konventsııasy Hatshylyǵynyń basshysy Ibragım Tıaý.
Afrıka
Shyǵys jáne Ońtústik Afrıkada 90 mıllıonnan astam adam azyq-túlik tapshylyǵyna tap boldy. Keı aýdandarda tarıhta bolmaǵan qurǵaqshylyq beleń aldy. Efıopııa, Zımbabve, Zambııa jáne Malavıde júgeri men bıdaı daqyldary kúıip ketedi. Tek Zımbabvede 2024 jyly júgeri ónimi ótken jylmen salystyrǵanda 70 paıyzǵa qysqardy, al 9 myń bas mal shól men ashtyqtan qyrylyp qaldy.
Somalıde 2022 jylǵy qurǵaqshylyq saldarynan týyndaǵan ashtyqtan 43 myń adam qaza tapty. 2025 jyldyń basynda 4,4 mıllıon adam — halyqtyń tórtten biri-azyq-túlikke qol jetkizýde qıyndyqtarǵa tap boldy. Zambııada álemdegi eń ótkir energetıkalyq daǵdarystardyń biri 2024 jyldyń sáýirine qaraı bastaldy. Onda Zambezı ózenindegi sý deńgeıi ortasha kórsetkishtiń 20 paıyzyna deıin tómendedi.
Jerorta teńizi
Ispanııada qurǵaqshylyq aýyl sharýashylyǵyna, týrızmge jáne sýmen qamtamasyz etýge áser etti. 2023 jyldyń qyrkúıegine qaraı eki jyldyq qurǵaqshylyq pen rekordtyq jylý záıtún daqyldarynyń 50 paıyzǵa tómendeýine ákelip soqtyrdy, bul záıtún maıy baǵasynyń eki ese ósýine ákeldi.
Sonymen qatar, Marokkoda 2025 jylǵa qaraı qoılar sany 2016 jylmen salystyrǵanda 38 paıyzǵa qysqardy, bul eldiń koroli dástúrli qurbandyqtardy joıýǵa shaqyrdy.
Túrkııada qurǵaqshylyq jerasty sýlarynyń sarqylýyn tezdetip, halyq pen ınfraqurylymǵa qaýip tóndiretin shuńqyrlardyń paıda bolýyna sebep boldy.