BUU qory elimizdegi ekologııalyq jobalarǵa qomaqty qarajat bóledi

ASTANA. KAZINFORM – BUU-nyń Jasyl klımattyq qory Qazaqstandaǵy 280 mln dollar somasyna ekologııalyq jobalardy qarjylandyrady. Bul týraly Ekologııa jáne tabıǵı resýrstar mınıstri Erlan Nysanbaev málim etti.

- Jasyl klımattyq qor, klımattyń ózgerýine qarsy kúreste jáne oǵan beıimdelýde elderdi qoldaýdyń negizgi qarjylyq tetigi bolyp tabylady. Halyqaralyq uıymdardyń qoldaýymen Qazaqstanǵa osy Qor tarapynan shamamen 280 mln AQSh dollaryna qarjylandyrý kelip túsetini qarastyrylǵan. Atalǵan qarajat jańartylatyn energııa kózderin damytýǵa, ónerkásip sektorynda tómen kómirtekti tehnologııalardy engizýdi yntalandyrýǵa, sondaı-aq elektromobılderdi damytýdy qoldaýǵa baǵyttaldy, - dedi E. Nysanbaev Senatta ekologııa salasynda ozyq tehnologııalardy engizý taqyrybyn talqylaý kezinde.

Mınıstr jasyl jobalardy ilgeriletý úshin Readiness II jobasy aıasynda 2024 jyly Jasyl klımattyq qorǵa arnalǵan Eldik baǵdarlama daıyndalǵanyn eske saldy. Oǵan 7 joba engizilgen. Jobalar energetıka sektoryndaǵy parnıktik gazdar shyǵaryndylaryn azaıtýǵa, aýyldy eldi mekenderdegi ortalyqtandyrylǵan sýmen jabdyqtaý júıeleriniń turaqtylyǵyn arttyrýǵa, mal sharýashylyǵy fermalaryn jańǵyrtýǵa, sondaı-aq «jasyl» qarjylandyrý salasyndaǵy jeke sektordyń bastamalaryn qoldaýǵa baǵyttalǵan. Bul jobalardyń quny shamamen 1 mlrd AQSh dollardy qurasa, onyń 630 mıllıonyn atalǵan Qor qarjylandyrýy múmkin.

Sonymen qatar, Qazaqstanda jańartylatyn energııa kózderi boıynsha Jasyl klımattyq qor men Eýropalyq Qaıta qurý jáne Damý Banki baǵdarlamasy aıasynda jalpy qýattylyǵy 330 MVt bolatyn jańartylatyn energııa kózi salasynda 11 jobanyń qurylysyn qoldaý kózdelgen. Qazir 9 joba qarjylandyryldy (jobany iske asyrý merzimi 2017- 2027 jyldar).

Budan buryn habarlanǵandaı, Senattaǵy jıynda depýtat Álı Bektaev elimizde ekologııa salasynda ozyq tehnıkalarǵa kóshý protsesi bastalǵanymen, ony iske asyrý áreketi kóptegen júıelik kedergilerge tap bolǵanyn aıtty.