BUU Konventsııasynyń normalaryn qoldanýǵa qatysty semınar-trenıng ótedi
ASTANA. 14 maýsym. QazAqparat /Qanat Mámetqazyuly/ - Astanada 15-17 maýsym aralaǵynda Bas prokýratýranyń 7-shi Departamenti jáne Bas prokýratýra ınstıtýty EQYU Ortalyǵymen birlese otyryp BUU Azaptaýǵa qarsy konventsııasynyń normalaryn qoldaný jáne ustaýdaǵy, qylmystyq jazasyn óteý úshin qamaýǵa alynǵan tulǵalardyń quqyǵynyń saqtalýyn qadaǵalaýdy jetildirý máseleleri boıynsha semınar-trenıng ótkizedi. Sharaǵa oblys prokýrorynyń orynbasarlary men óńirlik prokýrorlar kómekshileri qatysatyn bolady.
Semınar-trenıng baǵdarlamasyna sáıkes alǵashqy eki kún EQYU sarapshylarynyń qatysýymen BUU azaptaýǵa qarsy konventsııasy normalarynyń qoldanylýy máseleleri qaralady. Al, sharanyń sońǵy úshinshi kúni ustalǵan, qamaýǵa alynǵan jáne jazasyn ótep jatqan tulǵalardyń quqyǵyn qorǵaýdy qadaǵalaýda quqyq qoldaný tájirıbesiniń máselelerin talqylaý josparlanyp otyr. Semınarda aıasynda qaralatyn taqyryptardyń ózektiligi eskerile otyryp, 7-shi Departament basshylyǵy jedel qyzmetkerler jáne oblys prokýratýrasy men aýdandyq satydaǵy jekelegen basshylardyń baıandamalarynyń taqyryptary belgilengen.
Trenıng jumysyna tyńdaýshy retinde oblys prokýrorlaryna jetekshilik etetin orynbasarlar, Almaty, Atyraý, Batys Qazaqstan, Qyzylorda, Mańǵystaý oblystary prokýrorlarynyń aǵa kómekshileri, Bas áskerı jáne Kólik prokýrorlary, sonymen birge Astana, Almaty qalalary mamandandyrylǵan prokýrorlary, Aqmola, Shyǵys Qazaqstan, Jambyl, Qaraǵandy, Qostanaı, Pavlodar, Soltústik Qazaqstan jáne Ońtústik Qazaqstan prokýrorlarynyń kómekshileri qatysady. Sarapshy retinde Latvııa prokýrory, sonymen birge EQYU-nyń óńirlik ókili A.Arýtıýnıan sharaǵa qatysýǵa kelisimin bergen.
