BUU Kongoda qarýly toptardyń qolynan 410 balany bosatyp aldy
ASTANA. KAZINFORM — BUU bitimgershilik kúshteri men BUU Balalar qory (ıÝNISEF) Kongo Demokratııalyq Respýblıkasyndaǵy (KDR) qarýly toptardyń qolynda bolǵan 410 balany birlesip bosatqanyn jarııa etti, dep habarlaıdy Sınhýa.
Bul týraly BUU Bas hatshysy Antonıý Gýterrıshtiń baspasóz hatshysy Stefan Dıýjarrık seısenbi kúni málimdedi.
Onyń aıtýynsha, KDR-daǵy bitimgershilik mıssııasy Soltústik Kıvý men Itýrı provıntsııalarynda qarýly toptar ustaǵan 344 ul men 66 qyzdy bosatý úshin qańtardan qyrkúıekke deıin ıÝNISEF-pen birlesip jumys istegen.
S.Dıýjarrıktiń aıtýynsha, bostandyqqa shyqqan balalardyń qıyn jaǵdaıdan keıin qalypty ómirge oralýǵa kómektesetin qyzmetterge jiberiledi.
— Sol kezeńde Birikken Ulttar Uıymy balalardy jaldaý men paıdalanýdyń (qarýly toptar tarapynan) 165 faktisin tekserdi, onyń ishinde 30 qyz jáne 135 ul bolǵan. Áriptesterimiz bizge bul san qaqtyǵystan zardap shekken aımaqtarda balalar áli de osal ekenin kórsetedi jáne aldyn alý, esep berý jáne uzaq merzimdi reıntegratsııany qoldaýdy qosa alǵanda, turaqty qorǵaý sharalarynyń qajettiligin tanytyp otyr, — dedi ol.
S.Dıýjarrık dúnıejúzilik uıymnyń «Balalar jáne qarýly qaqtyǵystar» baǵdarlamasy aıasynda bitimgershilik mıssııalary balalarǵa qatysty óreskel quqyq buzýshylyqtardyń, sonyń ishinde olardy qarýly kúshter men toptardyń áskerge alýy men paıdalanýynyń aldyn alý jáne áreket etý boıynsha jumys isteıtinin aıtty.
Buǵan deıin Kongo Demokratııalyq Respýblıkasynyń (KDR) Áskerı soty eks-prezıdent Jozef Kabılany syrttaı ólim jazasyna keskenin jazǵan bolatynbyz. 54 jastaǵy Kabıla áskerı qylmys, memleketke opasyzdyq jáne adamzatqa qarsy qylmys jasaǵany úshin kináli dep tanyldy.