BUU: Kongonyń 28 mıllıon turǵyny azyq-túlikke muqtaj

ASTANA. KAZINFORM – Jaǵdaıdyń ýshyǵýyna qarýly qaqtyǵys pen ekonomıkalyq daǵdarys sebep boldy, dep jazdy Anadoly saıty.

Kongo Demokratııalyq Respýblıkasynda 28 mıllıonnan astam adam azyq-túlikke muqtaj. Bul týraly Azyq-túlik jáne aýylsharýashylyq uıymy men BUU-nyń Dúnıejúzilik azyq-túlik baǵdarlamasynyń (WFP) taldaýynda aıtylǵan.

Derekter kórsetkendeı, daǵdarys deńgeıinde ashtyqpen betpe-bet kelgen adamdardyń sany sońǵy aılarda 2,5 mıllıonǵa ósip, buryn-sońdy bolmaǵan deńgeıge jetti. Onyń ishinde 3,9 mıllıonǵa jýyq adam gýmanıtarlyq apattyń aldynda tur.

Jaǵdaıdyń ýshyǵýyna uzaqqa sozylǵan qarýly qaqtyǵys, ekonomıkalyq daǵdarys jáne azyq-túlik baǵasynyń ósýi sebep bolǵany atalyp ótedi.

Ásirese eldiń soltústik jáne ońtústik Kıvý, Itýrı jáne Tanganıka sııaqty shyǵys provıntsııalarynda jaǵdaı qıyn.

— Kongo Demokratııalyq Respýblıkasyndaǵy gýmanıtarlyq jaǵdaı qorqynyshty qarqynmen nasharlap barady. Qazirdiń ózinde dastarhanǵa tamaq qoıý úshin kúresip júrgen otbasylar endi budan da qatal shyndyqqa tap boldy, — dedi WFP Ońtústik Afrıka boıynsha aımaqtyq dırektory Erık Perdıson.

Agenttikterdiń málimetinshe, shyǵys provıntsııalardaǵy 10 mıllıonnan astam adam daǵdarys nemese tótenshe jaǵdaıdaǵy azyq-túlik tapshylyǵynan zardap shegedi.

Gýmanıtarlyq kómekti jetkizý tek qaýipti jaǵdaımen ǵana emes, ekonomıkalyq daǵdaryspen de shektelip otyr.

BUU málimetinshe, sońǵy úsh aıda negizgi azyq-túlik ónimderi — júgeri uny, palma maıy quny 37 paıyzǵa ósken.

— Jaǵdaı óte aýyr: egin joıyldy, baǵalar sharyqtap barady jáne mıllıondaǵan adamnyń jaǵdaıy aýyr halde, — dedi FAO Kongodaǵy ókiliniń mindetin atqarýshy Atman Mravılı.

Onyń aıtýynsha, qosymsha qarjysyz aýyl halqyn ashtyqtan qutqarý múmkin emes.

BUU qazirdiń ózinde shuǵyl kómek kórsetip otyyr. 2025 jyldyń basynan beri 464 myń adam azyq-túlikpen, aqshalaı járdemaqymen qamtyldy. Durys tamaqtaný, emdeý máselesi de bar. Onyń ishinde 237 myń  Býnııa qalasynyń turǵyny da bar.

Buǵan deıin habarlanǵandaı, Kongoda maımyl sheshegimen aýyrǵan 128 adam emdeý ortalyqtarynan qashyp ketti.