BUU QK tálipterge beıbit halyqtyń Aýǵanstannan shyǵyp ketýine múmkindik berýin mindettedi

NUR-SULTAN. QazAqparat - BUU Qaýipsizdik Keńesi «Talıban» qozǵalysynan óz mindetterin oryndap, Aýǵanstannan ketýdi qalaıtyndarǵa múmkindik berýdi talap etetin qarardy maquldady, dep habarlaıdy QazAqparat Euronews-ke silteme jasap.

Frantsııa, Ulybrıtanııa jáne AQSh jasaǵan qarardy qoldap Qaýipsizdik Keńesiniń 13 múshesi daýys berdi. Reseı men Qytaı qalys qaldy.

Qaýipsizdik Keńesi 2593 qararyn qabyldady, onda Aýǵanstannan ketkisi keletin barlyq aýǵandyqtar nemese sheteldik azamattardyń kez kelgen ýaqytta áýe nemese qurlyq shekaralary arqyly esh kedergisiz elden ketýine múmkindik beretini kórsetilgen.

Qabyldanǵan qararǵa sáıkes, Aýǵanstan terrorısterdiń platsdarmy retinde paıdalanylmaýy kerek. Gýmanıtarlyq kómek kórsetýge bar kúshti salýǵa basty nazar aýdarylyp otyr.

Frantsııa prezıdenti Emmanýel Makronnyń pikirinshe, tálipter terrorızmge qarsy kúresip, gýmanıtarlyq quqyqtar men adam quqyǵy, sonyń ishinde aýǵan áıelderiniń quqyǵyn qorǵaıtyn bolsa, olardy moıyndaý máselesin qarastyrýǵa bolady.