BUU QK-ne múshe bolý Qazaqstannyń beıbitshilik pen qaýipsizdik saqtaýdaǵy aýqymdy bastamalarynyń zańdy jalǵasy - D.Abaev
Bul pikirdi búgin dıplomatııalyq bıznes-klýb ókilderiniń kezekti otyrysynda QR Aqparat jáne kommýnıkatsııalar mınıstri Dáýren Abaev bildirdi.
Mınıstr óz sózinde bıyl elimiz qasterli Táýelsizdigimizdiń 25 jyldyǵy atap ótip jatqandyǵyn, osynaý belesti Qazaqstan álem elderimen terezesi teń, dúnıejúzilik qoǵamdastyqtyń bedeli múshesi retinde eńsergenin atap ótti.
«Tarıh úshin az ǵana ýaqyt ishinde elimiz asa bedeldi birneshe halyqaralyq uıymǵa múshe bolyp ǵana qoımaı olarǵa tabysty jetekshilik etýde. Kúni keshe biz el tarıhyndaǵy taǵy bir jarqyn jetistikke qol jetkizdik. Elimiz BUU Qaýipsizdik keńesiniń quramyna saılandy. Osynyń barlyǵy eń aldymen Elbasy basshylyǵymen syndarly syrtqy saıasatty qalyptastyrǵan otandyq dıplomatııanyń ólsheýsiz qyzmetiniń jemisi. Endigi jerde bedeldi uıymda jahandyq problemalardy sheshýge úlesin qosýǵa Qazaqstannyń bedeli de, tájirıbesi de jetedi dep oılaımyn. Jer júziniń halqy qazir Qazaqstandy álem alpaýyttarynyń arasynda araaǵaıyndyqqa júretin, bárin bir mámlege keltire alatyn bitimger retinde biledi, qurmetteıdi», - dedi ol.
Sondaı-aq mınıstr óz sózinde memleketterdiń ózara senimi men yqpaldastyǵyn arttyrǵan Táýelsiz memleketter dostastyǵynyń, Shanhaı yntymaqtastyq uıymynyń jáne Eýrazııalyq ekonomıkalyq odaqtyń qurylýyna da Qazaqstannyń bastamashy bolǵanyn eske salyp ótti.
«Endeshe, BUU Qaýipsizdik keńesi múshesi bolýdy Qazaqstannyń álemdegi beıbitshilik pen qaýipsizdik saqtaý baǵytyndaǵy aýqymdy bastamalarynyń zańdy jalǵasy dep ataýǵa bolady. Búgingideı kúrdeli ǵalamdyq ahýal jaǵdaıynda elimizdiń osyndaı jaýapty mıssııany abyroımen atqaratynyna sózsiz senimdimiz. Osy oraıda Aqparat jáne kommýnıkatsııalar mınıstrligi qashan da eldik múddeni dittegen osynaý isterge óz úlesin qosatyn bolady», - dedi D.Abaev.
