BUU QK-de Qazaqstannyń syrtqy saıasattaǵy basymdyqtary talqylandy

ASTANA. QazAqparat -BUU janyndaǵy Qazaqstannyń turaqty ókili Qaırat Omarov BUU janynda akkredıttelgen úkimettik emes uıymdardyń ókilderimen kezdesti. Bul týraly QazAqparat SІM baspasóz qyzmetine silteme jasap habarlaıdy.

Jıynda Qaýipsizdik Keńesine Qazaqstannyń tóraǵalyq etýdegi basty sharalary retinde qazaqstandyq dıplomat Prezıdent Nursultan Nazarbaevtyń qatysýymen 18 qańtarda ótetin «Jappaı qyryp-joıýǵa arnalǵan qarýdyń taralmaýy: senim sharalary» taqyrybyndaǵy brıfıngin, 19 qańtarda Syrtqy ister mınıstri Qaırat Ábdirahmanovtyń tóraǵalyq etýimen ótetin Ortalyq Azııa men Aýǵanstan boıynsha mınıstrlikter deńgeıindegi debatty atap ótti.

Qaırat Omarov Qaýipsizdik Keńesiniń kún tártibindegi jáne memleketimizdiń jahandyq saıasat aýqymyndaǵy syrtqy saıası basymdyqtary jaıly ózekti saýaldarǵa jaýap berdi. Suraqtardyń kóbi Sırııa máselesi boıynsha Astana protsesin ótkizýdegi Qazaqstannyń róli men kezdesýlerdiń nátıjesi, ıadrolyq qarýlardy taratpaý baǵyttaryndaǵy el men Prezıdenttiń qosqan úlesi, Taıaý Shyǵystaǵy, Iemendegi birqatar máseleler, Mıanmadaǵy ahýal jáne ózge de suraqtar qoıyldy.

Sarapshylar óz sózinde beıbitshilikke kelgende saıası jiger men berik ustanymyn tanyta bilgen, ıadrolyq qarýlardan ada erkin álemdi qurý ıdeıasyn jalǵaýǵa kúsh salǵan, ıadrolyq qarýlardan bas tartqan Qazaqstan men onyń Prezıdenti Nursultan Nazarbaevtyń tarıhı sheshimine joǵary baǵa berdi. QHDR men ózge de memleketterge qazaqstandyq úlginiń mańyzdy bolary atalyp ótti.

Kezdesýge qarýsyzdandyrý, adam quqyǵy, áıelder men balalardy qorǵaý, qarýly qaqtyǵystarda qaýipsizdikti qorǵaý salalary boıynsha 40-qa jýyq sarapshylar birlestigi qatysty.