BUU Qazaqstannyń jemqorlyqqa qarsy saıasatyna oń baǵa berdi

NUR-SULTAN. QazAqparat - QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev BUU Esirtki jáne qylmys jónindegi basqarmasynyń aqshany jylystatýǵa jáne terrorızmdi qarjylandyrýǵa qarsy is-qımyl máseleleri boıynsha Ortalyq Azııa elderindegi keńesshisi Aleksandr Vodıanoımen kezdesti, dep habarlaıdy QazAqparat.

Agenttiktiń Telegram kanalynda jarııalanǵan aqparatqa qaraǵanda, Alık Shpekbaev qonaqty iske asyrylyp jatqan reformalarmen, vedomstvonyń jumysymen jáne negizgi nátıjelerimen tanystyrdy.

Óz kezeginde, Aleksandr Vodıanoı BUU EQB-nyń Ortalyq Azııadaǵy quqyqtyq júıeni, sybaılas jemqorlyqqa jáne qylmystyq kiristerdi jylystatýǵa qarsy kúres jónindegi saıasat pen ulttyq strategııany nyǵaıtý boıynsha qyzmeti jaıly aıtyp berdi.

«Agenttik mamandarynyń joǵary deńgeıdegi quziretimen jáne sybaılas jemqorlyqqa qarsy is-qımyl máselelerin sheshýdegi keshendi tásilimen erekshelenedi», – dedi A.Vodıanoı.

Sondaı-aq, ol eldiń sybaılas jemqorlyqqa qarsy saıasatty iske asyrýdaǵy tásilderine oń baǵa berdi. Halyqaralyq standarttar men ozyq tájirıbelerge sáıkes keletin aldyn alý sharalarynyń basymdyǵy men sybaılas jemqorlyqqa qarsy kúres máselelerine qoǵamdy jumyldyrýǵa nazar aýdardy. Kezdesýge qatysýshylar sybaılas jemqorlyqqa qarsy kúreste ujymdyq kúsh-jiger qabyldaýdyń mańyzdylyǵyn atap ótip, aldaǵy ózara árekettestik boıynsha naqty qadamdardy anyqtady.