BUU Qazaqstannyń jahandyq birlik týraly bastamasyna qoldaý bildirdi
NıÝ-IORK. KAZINFORM – BUU-nyń 80 jyldyǵy qarsańynda, sondaı-aq Birikken Ulttar Uıymy men Shanhaı yntymaqtastyq uıymy arasyndaǵy yntymaqtastyqtyń 20 jyldyǵyna oraı BUU Bas Assambleıasy «BUU men Shanhaı yntymaqtastyq uıymy arasyndaǵy yntymaqtastyq» qararyn qabyldady. Onda Qazaqstan Prezıdenti Qasym-Jomart Toqaevtyń «Ádil álem, kelisim jáne damý jolyndaǵy jahandyq birlik týraly» bastamasyna qoldaý bildirildi. Bul týraly QR Syrtqy ister mınıstrligi baspasóz qyzmeti málimdedi.
Qazaqstannyń ShYU-ǵa tóraǵalyǵy aıasynda 2024 jylǵy 4 shildede Astanada ótken «ShYU plıýs» sammıtinde QR Prezıdenti usynǵan jáne Memleketter basshylary keńesi maquldaǵan bastama BUU-nyń ortalyq úılestirýshi róli jaǵdaıynda neǵurlym ádiletti, demokratııalyq jáne kóppolıarly álemdik tártipti qalyptastyrýǵa baǵyttalǵan jahandyq kúsh-jigerge mańyzdy úles bolyp tanyldy.
BUU Bas Assambleıasynyń qarardy qabyldaýy memleketterdiń yntymaqtastyǵyn nyǵaıtýǵa, barlyq eldiń teń múmkindikterin qamtamasyz etýge jáne ózara senim men seriktestik qaǵıdattaryn ilgeriletýge baǵyttalǵan qazaqstandyq bastamanyń halyqaralyq qaýymdastyq tarapynan keń qoldaý tapqanynyń aıqyn dáleli boldy.
Atalǵan qujat Qazaqstannyń álemdik qaýymdastyqta suranysqa ıe bastamalardy usynatyn orta derjava retindegi óskeleń rólin kórsetip, ShYU-nyń jahandyq arenada ustanymy barǵan saıyn belsendi estiletin bedeldi óńirlik uıym retindegi mańyzdylyǵyn kórsetedi.
Aıta keteıik, Qytaı engizgen jáne ShYU-ǵa múshe barlyq memleketti qosa alǵanda, 40-qa jýyq el qoldaǵan qararda uıymnyń aımaqtyq beıbitshilikti, damýdy, ózara senim men yntymaqtastyqty ilgeriletýdegi syndarly róli joǵary baǵalandy.