BUU Qazaqstanǵa bitimgerlik mıssııaǵa jylyna 5 mln dollar tólem jasaıdy

ASTANA. KAZINFORM – Búgin Májilistiń jalpy otyrysynda «BUU-nyń bólýdi baqylaý jónindegi kúshterine (UNDOF) resýrs usynatyn QR Úkimeti men BUU arasyndaǵy ózara túsinistik týraly memorandýmdy ratıfıkatsııalaý týraly» zańy men «2024 jylǵy 14 aqpandaǵy BUU-nyń bólýdi baqylaý jónindegi kúshterine (UNDOF) resýrs usynatyn QR Úkimeti men BUU arasyndaǵy ózara túsinistik týraly memorandýmǵa hattar almasý nysanyndaǵy kelisimdi ratıfıkatsııalaý týraly» zańy qabyldandy. 

БҰҰ Қазақстанға бітімгерлік миссияға жылына 5 млн доллар төлем жасайды
Фото: pexels.com

Zań jobasymen Qorǵanys mınıstriniń orynbasary Shaıh-Hasan Jazyqbaev tanystyra otyryp halyqaralyq shart 2024 jylǵy 19 qańtardaǵy «Biriken Ulttar Uıymynyń mıssııalarynda qatysý úshin Qazaqstan Respýblıkasy Qarýly Kúshteri bitimgershilik kontıngentin jiberý týraly Qazaqstan Respýblıkasynyń Prezıdenti Qasym-Jomart Toqaevtyń usynysy týraly» Parlament qaýlysyn iske asyrý úshin qol qoıylǵanyn aıtty.

- Mıssııaǵa qatysý úshin qazaqstandyq personaldy jáne múlikti usynýdyń ákimshilik, logıstıkalyq jáne qarjylyq sharttardy belgileıtin negizgi memorandýmǵa 2024 jylǵy 14 aqpanda qol qoıyldy. Qujat bitimgershilik operatsııalarǵa óz kúshterin beretin barlyq elder úshin ortaq standart. 2024 jylǵy naýryzdan beri 139 áskerı qyzmetshiler men 26 áskerı tehnıkadan turatyn ulttyq kontıngent Golan bıiktigindegi bitimgershilik mıssııaǵa qatysty. Golan bıiktigindegi mıssııanyń maqsaty Izraıl men Sırııa arasyndaǵy tatýlyqty qoldaý, sondaı-aq Izraıl men Sırııa áskerleriniń bólinýin baqylaý men qadaǵalaý, - dedi Shaıh-Hasan Jazyqbaev Májilistiń jalpy otyrysynda. 

Onyń aıtýynsha, BUU Qazaqstannyń atalǵan mıssııaǵa qatysqany úshin jylyna shamamen 5 mln AQSh dollar tólem jasaıdy. Onyń ishinde shamamen 2,4 mln AQSh dollary jeke quram tólemi, qalǵan 2,6 mln AQSh dollary tehnıka, qarý-jaraq pen múlikti jalǵa alýǵa baǵyttalǵan. 

- Ár bitimger áskerı qyzmetshige aıyna 1448 AQSh dollar bolatyn mólsherleme bekitilgen. «Qazaqstan Respýblıkasynyń bitimgershilik qyzmeti týraly» zańǵa sáıkes memlekettiń bitimgershilik operatsııaǵa shyǵynyn óteý tártibinde BUU bólinetin qarajat respýblıkalyq bıýdjet kirisine túsedi. BUU-men qarjylyq máselelerdi retteý maqsatynda memorandýmǵa qosymsha kelisim jasalyndy. Jobany BUU hatshylyǵymen kelisý 9 aı ýaqyt aldy, ótken jyldyń sońynda qol qoıyldy, - deıdi ol. 

Sondaı-aq spıker BUU-dan túsetin tólemdi ekige bólinetinin aıtty, ıaǵnı bir bóligi áskerı qyzmetshige jalaqy retinde tólenedi, al múlik, tehnıkaǵa túsetin qarjy memlekettik bıýdjetke túsedi.

- Qaralyp jatqan halyqaralyq sharttar halyqaralyq beıbitshilik pen qaýipsizdikti qamtamasyz etýdi kózdeıdi, sondaı-aq Qazaqstan Respýblıkasynyń zańdarynan ózgeshe qaǵıdalardy belgileıdi, sondyqtan olar ratıfıkatsııalanýǵa jatady. BUU-nyń bitimgershilik mıssııalaryna qatysý arqyly halyqaralyq jáne óńirlik qaýipsizdikti nyǵaıtýǵa Qazaqstannyń qosatyn úlesi memleketimizdiń bedelin arttyrady, - deıdi mınıstrdiń orynbasary. 

Eske sala ketsek, sońǵy 30 jylda BUU Qazaqstanda ulttyq, óńirlik jáne jergilikti deńgeılerde 400-den astam jobany iske asyrdy

Сейчас читают