BUU qazaqstandyq bitimgerlerdiń daıyndyǵyna joǵary baǵa berdi
ASTANA. KAZINFORM — Golan jotasynda qyzmet atqaryp jatqan Qazaqstannyń ulttyq bitimgerlik kontıngenti BUU-nyń bólinýdi baqylaý jónindegi kúshter shtaby (UNDOF) ótkizgen baǵalaý ınspektsııasynan sátti ótti, dep habarlaıdy Qorǵanys mınıstrliginiń baspasóz qyzmeti.
Inspektsııa qorytyndysy boıynsha qazaqstandyq kontıngenttiń qyzmetine joǵary baǵa berildi. Áskerı qyzmetshiler kásibı daıarlyq deńgeıin jáne túrli shuǵyl jaǵdaılarda qoıylǵan mindetterdi tıimdi oryndaýǵa daıyn ekenin kórsetti.
Qazaqstannyń úshinshi ulttyq bitimgerlik kontıngentin podpolkovnık Іlııas Almatov basqarady. Mıssııa mandaty aıasynda qazaqstandyq bitimgerler patrýldeý, baqylaý-ótkizý beketterin kúzetý, jarylǵysh zattardy joıý, sondaı-aq BUU qyzmetkerlerin alyp júrý jáne evakýatsııalaý mindetterin atqaryp keledi.
— Maýsym-qyrkúıek aılary aralyǵynda ulttyq kontıngent 470 jedel is-shara ótkizdi. Onyń ishinde patrýldeý jumystarymen qatar, 49 ýaqytsha túngi baqylaý beketi uıymdastyrylyp, jedel áreket etý kúshteriniń 11 oqý-jattyǵýy ótkizildi. Sonymen qatar jergilikti qaýymdastyq ókilderimen 11 kezdesý uıymdastyryldy. Injenerlik-saperlik top 350 jarylǵysh zat pen atys qarýyna arnalǵan 1 800 oq-dárini anyqtap, joıdy, — delingen habarlamada.
Vedomstvo atap ótkendeı, qazaqstandyq bitimgerlik kontıngent BUU mandatyna sáıkes mindetterin oryndaýdy jalǵastyryp jatyr. Olar jaýapkershilik aımaǵynda jaǵdaı turaqtylyǵyn baqylaýǵa jáne kez kelgen jaǵdaıda jedel áreket etýge ázir.
Buǵan deıin 15 shildede qazaqstandyq bitimgerler Lıvandaǵy BUU mıssııasynda qyzmet atqarýǵa attanǵanyn jazǵanbyz.
