BUU qazaqstandyq bitimgerler qyzmetiniń deńgeıin joǵary baǵalady
ASTANA. KAZINFORM — Golan jotasyndaǵy «BUU-nyń ajyratýdy baqylaý kúshteri» mıssııasy komandıriniń rezervtik bitimgerlik rotasynyń úshinshi quramymen mıssııa shtabynyń bastyǵy polkovnık Anýp Bıkram Rana kezdesti, dep habarlaıdy Qorǵanys mınıstrliginiń baspasóz qyzmeti.
Sapar barysynda mıssııa ókili ınfraqurylym nysandaryn, ınjenerlik tehnıkany, operatsııalyq quraldardy qarap shyǵyp, jaýapkershilik aımaǵyndaǵy BUU baqylaý beketteriniń jumysymen tanysty.
Qazaqstandyq áskerı qyzmetshilermen ótken kezdesýde polkovnık Anýp Bıkram Rana qyzmetti uıymdastyrý, qaýipsizdikti qamtamasyz etý jáne qoıylǵan mindetterdi odan ári oryndaý máselelerin talqylady. Taraptar mıssııa mandatyn oryndaýǵa baılanysty basym baǵyttarǵa erekshe nazar aýdardy.
Eske sala keteıik, qazaqstandyq bitimgerlik kontıngent halyqaralyq beıbitshilik pen qaýipsizdikti saqtaýǵa eleýli úles qosyp keledi. Olar jaýapkershilik aımaǵyndaǵy ahýaldy táýlik boıy baqylap, aýmaqty patrýldeıdi jáne qaqtyǵys taraptary arasyndaǵy atysty toqtatýdy qamtamasyz etýge qatysady.
— Bitimgerler jergilikti aýmaqty jedel mınasyzdandyrý, jarylǵysh zattar men qoldan jasalǵan jarylǵysh qurylǵylardy joıý mindetterin oryndaıdy. Sonymen qatar olar mıssııa nysandary men beketterine qyzmet kórsetip, BUU qyzmetkerleriniń qaýipsizdigin qamtamasyz etip, gýmanıtarlyq júkterdi alyp júredi jáne jergilikti halyqqa medıtsınalyq kómek kórsetedi, — delingen habarlamada.
Bitimgerlerdiń óz mindetterin kásibı, adal ári minsiz oryndaýy Qarýly kúshterdiń jáne Qazaqstannyń halyqaralyq arenadaǵy bedelin nyǵaıtady.
Budan buryn Golan jotasynda qazaqstandyq bitimgerlerdiń josparly rotatsııasy ótkenin jazdyq.
