BUU Qazaqstanda jol qaýipsizdigi boıynsha jahandyq naýqandy iske qosty

-Bul bastama sport, kıno jáne mýzyka salasyndaǵy tanymal tulǵalardyń qoldaýymen júzege asyrylyp, jol qozǵalysy qaýipsizdigin arttyrýǵa jáne jol-kólik oqıǵalary saldarynan bolatyn ólim men jaraqattardy azaıtýǵa baǵyttalǵan,-dep habarlaıdy BUU-nyń kommýnıkatsııalar jónindegi keńesshisi.

Habarda sonymen qatar 2026 jylǵy 3 sáýirden bastap Astana jáne Almaty qalalarynda RTSDecaux kompanııasynyń jarnamalyq nysandarynda naýqan materıaldary ornalastyrylǵany aıtylǵan.

Naýqanǵa Novak Djokovıch, Jan Reno, Maıkl Fassbender jáne Mıshel Ieo sııaqty álemge tanymal tulǵalar qatysyp, jol qaýipsizdigi boıynsha negizgi habarlamalardy keń aýdıtorııaǵa jetkizip júr.

Naýqan álemniń 80 astam elin jáne 1000-nan astam qalasyn qamtydy. Bul bastamaǵa qosylý arqyly Qazaqstan jol qaýipsizdigin ilgeriletýge baǵyttalǵan aýqymdy halyqaralyq kúsh-jigerdiń bir bóligine aınalady.

Naýqan BUU Bas hatshysynyń jol qaýipsizdigi jónindegi Arnaıy ókiliniń keńsesi tarapynan JCDecaux kompanııasymen yntymaqtastyqta jáne Saatchi & Saatchi qoldaýymen júzege asyrylmaq. Ol qoǵam qaıratkerlerin, sheshim qabyldaýshylardy jáne pikir kóshbasshylaryn jol qaýipsizdigi boıynsha jeke jaýapkershilik alýǵa shaqyrady. Naýqan qarapaıym, tıimdi jáne ǵylymı dálelderge negizdelgen minez-qulyq úlgilerin nasıhattap, qaýip faktorlaryn azaıtýǵa baǵyttalǵan áreketterge úndeıdi.

-Jol-kólik oqıǵalary — bul búkil álemdegi «únsiz pandemııa», al Qazaqstanda olar jyl saıyn 2000-nan astam adamnyń ómirin qıyp, myńdaǵan otbasy men qoǵamǵa áser etip jatyr. Ólim-jitim deńgeıiniń tómendeýi jáne qaýipsizdik beldikterin mindetti paıdalaný sııaqty oń ózgeristerge qaramastan, jyldamdyqty asyrý jáne mas kúıinde kólik júrgizý sııaqty máseleler áli bar. Qozǵalys qarqyny artqan saıyn, jol qaýipsizdigin qamtamasyz etý úshin turaqty kúsh-jiger qajet, - dedi BUU Bas hatshysynyń jol qaýipsizdigi jónindegi Arnaıy ókili Jan Todt.

-Jol qozǵalysy qaýipsizdigi — tek kólik máselesi ǵana emes, bul qoǵamdyq densaýlyq, turaqty damý jáne adam ómirin saqtaý máselesi. Joldaǵy árbir ólim men aýyr jaraqattyń aldyn alýǵa bolady. Osy naýqan arqyly biz jaýapkershilik, ózara qurmet jáne júrgizýshilerdi, jolaýshylardy, jaıaý júrginshiler men velosıpedshilerdi qorǵaýǵa baǵyttalǵan qarapaıym, ómirdi saqtaıtyn sheshimder mádenıetin qalyptastyrýǵa umtylamyz. Qazaqstanda bul sondaı-aq qoǵamdy qaýipsiz, ınklıýzıvti jáne turaqty mobıldilik týraly keń aýqymdy dıalogqa tartýǵa múmkindik beredi, - dep atap ótti Qazaqstandaǵy BUU Turaqty úılestirýshisi Sarango Radnaragcha.

Jol-kólik jaraqattary jahandyq deńgeıde qoǵamdyq densaýlyq pen damý úshin mańyzdy problema bolyp qala beredi. Jyl saıyn álemde shamamen 1,19 mıllıon adam jol apattarynan qaza tabady jáne bul jastar arasyndaǵy ólimniń negizgi sebepteriniń biri bolyp tabylady. Qazaqstanda Bas prokýratýra derekterine sáıkes, 2025 jyly 36 146 jol-kólik oqıǵasy tirkelip, 1 796-synda adam ólgen.

-Almaty jáne Astana qalalarynda qoǵamdyq kólik aıaldamalarynyń óz jelisin paıdalanatyn bizdiń kompanııa, ókinishke qaraı, jol-kólik oqıǵalarymen únemi betpe-bet kezdesedi. Sondyqtan BUU-nyń #MakeASafetyStatement jahandyq naýqanyna qatysý biz úshin jaı ǵana aqparattyq qoldaý emes, Qazaqstan joldarynda jaýapkershilik pen qaýipsizdik mádenıetin qalyptastyrýǵa qosqan naqty úles bolyp tabylady. Syrtqy jarnama múmkindikterin paıdalana otyryp, biz mıllıondaǵan adamdarǵa qarapaıym, biraq ómirdi saqtaıtyn qaýipsiz minez-qulyq qaǵıdalaryn jetkizýdi maqsat etemiz. Bul qaǵıdalar adam ómirin saqtaýǵa jáne qalalyq ortany barlyq jol qozǵalysyna qatysýshylar úshin neǵurlym turaqty ári jaıly etýge yqpal etedi, — dep túıindedi RTSDecaux kompanııasynyń bas dırektory Arman Qaǵarov.

Naýqandy qoldaıtyn halyqaralyq tulǵalar qatarynda Dıde Drogba, Patrık Dempsı, Sharl Lekler, Mark Markes, Kaılı Mınoýg ı ıÝssý N’Dýr bar. Jalpy alǵanda, 16 álemdik tanymal tulǵa men Olımpıada chempıondary naýqannyń habarlamalaryn BUU-nyń alty resmı tilinde taratýǵa atsalysýda.

Naýqan jahandyq pikir kóshbasshylaryn jumyldyryp jáne aýqymdy medıa platformalardy paıdalana otyryp, minez-qulyq ózgeristerin jedeldetýge jáne 2030 jylǵa deıin jol-kólik oqıǵalarynan bolatyn ólim men jaraqattardy eki esege qysqartýdy kózdeıtin BUU-nyń Jol qaýipsizdigi jónindegi is-qımyl onjyldyǵynyń maqsattaryna qol jetkizýge baǵyttalǵan.

BUU Bas hatshysynyń jol qaýipsizdigi jónindegi Arnaıy ókiliniń keńsesi #MakeASafetyStatement naýqanyn halyqaralyq jáne ulttyq seriktestermen birlesip jalǵastyryp, jahandyq jol qaýipsizdigi kún tártibin ilgeriletýdi jáne barlyq jol qozǵalysy qatysýshylarynyń jaýapty minez-qulqyn nasıhattaýdy jalǵastyrady.

Aıta keteik, jýyrda Almatydaǵy jantúrshigerlik jol apaty bolyp, Prezıdent tapsyrmasynan keıin ІІM tergeýdi kúsheıtti.