BUU Qaýipsizdik keńesi Sýdandaǵy jedel áreket etý kúshteriniń komandırlerine sanktsııa saldy

ASTANA. KAZINFORM – BUU Qaýipsizdik keńesi Sýdannyń Jedel áreket etý kúshteriniń (JÁK) tórt komandırine sanktsııa saldy. Bul týraly halyqaralyq uıymnyń saıtynda jarııalandy, dep jazady Anadoly.

Baspasóz baıanynda Sýdan boıynsha 2005 jylǵy 1591-qarar negizinde qurylǵan Qaýipsizdik Keńesiniń komıteti BUU Jarǵysynyń VII taraýyna sáıkes engizilgen shekteý sharalaryna jatatyn tulǵalardy sanktsııalyq tizimge qosýǵa kelisim bergeni kórsetilgen.

Shekteý sharalary JÁK jetekshisiniń orynbasary Abdel Rahım Hamdan Dagloǵa qatysty engizildi. Sondaı-aq Jedel áreket etý kúshteriniń komandırleri Gedo Hamdan Ahmed Mýhammed, Alfateh Abdýlla Idrıs Adam jáne Tıdjanı Ibragım Mýsa Mýhammed te sanktsııaǵa ilikti.

Sanktsııalar aktıvterdi buǵattaýdy jáne saparlarǵa tyıym salýdy kózdeıdi. Usynysty Ulybrıtanııa, AQSh jáne Frantsııa 2005 jyly qabyldanǵan 1591-qararǵa súıene otyryp engizgen. Atalǵan qujat Sýdannyń Darfýr óńirine qarý-jaraq jetkizýge embargo jarııalaýdy qarastyrady.

Sýdandaǵy qaqtyǵys jáne jedel áreket etý iúshteriniń áreketteri

2023 jylǵy 15 sáýirden beri Sýdan aýmaǵynda ulttyq armııa men syrtqy qoldaýǵa ıe Jedel áreket etý kúshteri arasynda qııan-keski qaqtyǵystar jalǵasyp keledi.

Bul qarýly teketires álemdegi eń aýyr gýmanıtarlyq daǵdarystardyń birine aınalyp, ondaǵan myń adamnyń ómirin jalmady ári shamamen 13 mıllıon adamnyń qonys aýdarýyna sebep boldy.

Qazirgi tańda JÁK eldegi 18 shtattyń beseýiniń ortalyqtaryn baqylaýda ustap otyr. Al Sýdan armııasy qalǵan 13 shtatta, sonyń ishinde ońtústik, soltústik, shyǵys jáne ortalyq aımaqtarda, sondaı-aq astana Hartýmda bılikti saqtap otyr.

Osyǵan deıin Sýdanda sońǵy eki aıda 50 myńnan astam adam úıin tastap ketýge májbúr bolǵany týraly jazdyq.