BUU Qaýipsizdik Keńesi Irannyń ıadrolyq kelisimine kepil bolýy múmkin
ASTANA. KAZINFORM — BUU Qaýipsizdik Keńesiniń qarary Irannyń ıadrolyq baǵdarlamasy boıynsha bolashaq kelisimniń kepili bolýy múmkin, dep habarlaıdy Report.
Bul týraly Venadaǵy halyqaralyq uıymdar janyndaǵy Reseıdiń turaqty ókili Mıhaıl Ýlıanov málimdegen.
— Bolashaq kelisim jasalǵan bolsa, kepilgerler ınstıtýty kire me, ony ýaqyt kórsetedi. Eger BUU Qaýipsizdik Keńesiniń qarary kepilger bolyp tanylsa, onda biz mundaı qarardy qoldaıtyn bolamyz. Árıne, aldymen, kelisimniń sońǵy mátinin qaıta qaraýymyz kerek, — dep túsindirdi dıplomat.
Onyń aıtýynsha, qazirgi jaǵdaı eshkimdi qanaǵattandyrmaǵandyqtan, jańa kelisimdi ázirleýge qajettilik týyndaǵan.
Buǵan deıin AQSh prezıdenti Donald Tramp Axios basylymyna bergen suhbatynda Vashıngton Iran ıadrolyq baǵdarlamasy boıynsha mámile jasamaıynsha, Iran porttaryna teńiz blokadasyn jalǵastyratynyn aıtqan. Qysym quraly retinde AQSh Iran porttaryna jáne Ormýz buǵazy arqyly ótetin joldarǵa blokada jarııalaǵan. Al Iran Parsy shyǵanaǵy elderine baratyn kemeler úshin Ormýz buǵazy jabyq ekenin málimdegen. Bul jaǵdaı aımaqtaǵy jahandyq energetıkalyq daǵdarysty ýshyqtyrdy.
Buǵan deıin Tegeran kelissózderdiń jańa kezeńine daıyndyǵyn amerıkalyq blokadanyń aıaqtalýymen baılanystyryp, kez kelgen damýǵa daıyn ekenin málimdegen bolatyn.
