BUU Qaýipsizdik Keńesi Iranǵa qatysty sanktsııalardy toqtata almady
ASTANA. KAZINFORM – Juma kúni BUU Qaýipsizdik Keńesi Reseı men Qytaı usynǵan Iranǵa qarsy sanktsııalardy qaıta qalpyna keltirýdi keıinge qaldyrý jónindegi qarardy qabyldaı almady, dep habarlaıdy «BUU jańalyqtary».
Qarardy tórt memleket (Aljır, Qytaı, Pákistan jáne Reseı) qoldap daýys berse, toǵyz delegatsııa (Ulybrıtanııa, Danııa, Frantsııa, Grekııa, Panama, Serra-Leone, Slovenııa, Somalı) qarsy boldy, al Gaıana men Koreıa Respýblıkasy qalys qaldy.
Daýystaýǵa «ırandyq ıadrolyq kelisimge» qatysty rezolıýtsııanyń qoldanylý merzimin uzartýdy kózdeıtin qujat qoıyldy.
Eske sala ketsek, 2015 jyly Irannyń ıadrolyq baǵdarlamasyna baılanysty birlesken jan-jaqty is-qımyl jospary qabyldanǵan bolatyn. Bul kelisim sheńberinde Iran óziniń ıadrolyq baǵdarlamasyna shekteý qoıyp, esesine buryn engizilgen sanktsııalar alynyp tastaldy.
Sonymen qatar, qujatta eger Iran óz mindettemelerin oryndamasa, sanktsııalardy jedel qaıta qalpyna keltirý (snapback) tetigi qarastyryldy.
Reseı men Qytaı usynǵan jobalyq qarar Frantsııa, Germanııa jáne Ulybrıtanııa tarapynan osy tetikti qoldanýǵa baılanysty jasalǵan sheshimge jaýap retinde engizilgen edi. Qujat qabyldanbaǵandyqtan, sanktsııalar 28 qyrkúıekten bastap qaıta kúshine enedi.
Reseıdiń BUU janyndaǵy turaqty ókiliniń orynbasary Dmıtrıı Polıanskıı daýys berer aldynda Eýropa elderi men AQSh-ty «eskalatsııa baǵytyn ustanyp otyr» dep aıyptady. Onyń aıtýynsha, Iran barlyq talaptardy oryndaǵanymen, sanktsııany keıinge qaldyrýǵa qatysty usynystar qabyldanbady.
Al Ulybrıtanııanyń BUU janyndaǵy turaqty ókili Barbara Výdvord Irannyń ıadrolyq qarýdy taratpaýǵa qatysty halyqaralyq rejımdi qurmettemeıtinin atap ótti. Ol MAGATE-niń sońǵy alty jylda daıyndaǵan 60-tan astam baıandamasyna súıene otyryp, sanktsııalardyń qaıta kúshine enetinin jáne BUU-ǵa múshe barlyq memleketter olardy oryndaýǵa mindetti ekenin aıtty.
Sonymen birge, Výdvord Ulybrıtanııa bolashaqta sanktsııalardy alyp tastaýǵa múmkindik beretin dıplomatııalyq sheshim izdeýge daıyn ekenin jetkizdi.
Iran syrtqy ister mınıstri Abbas Aragchı qazirgi jaǵdaıdy AQSh-tyń ıadrolyq kelisimnen shyǵýynyń jáne Eýropanyń óz mindettemelerin oryndaýdaǵy álsizdiginiń saldary dep atady.
Buǵan qosa, Tegeran Eýropa elderiniń sanktsııalardy qaıtarý áreketine jaýap retinde MAGATE-men yntymaqtastyqty toqtatatynyn jarııalady.