BUU Qaýipsizdik keńesi Dohaǵa jasalǵan soqqyny aıyptady
ASTANA.KAZINFORM - Izraıldiń Qatar astanasyna shabýyly BUU-nyń Qaýipsizdik keńesinde qyzý pikirtalas týdyrdy, dep habarlaıdy Kazinform agenttiginiń menshikti tilshisi.
Beısenbi kúni BUU Qaýipsizdik Keńesi Dohaǵa jasalǵan soqqyny aıyptady, biraq málimdemede Izraıl týraly eshteńe aıtylmaǵan. Qujatty barlyq 15 múshe el maquldady, sonyń ishinde Izraıldiń dástúrli odaqtasy AQSh ta bar. Mátindi Ulybrıtanııa men Frantsııa daıyndady.
Málimdemeni AQSh-tyń qoldaýy premer-mınıstr Bınıamın Netanıahý sanktsııalaǵan áreketterge Donald Tramptyń rıza emes ekenin kórsetedi. Vashıngton buǵan deıin shabýyldardy HAMAS kóshbasshylarynyń kózin joıý áreketi jáne ol AQSh pen Izraıl múddesine saı emes degen bolatyn.
- Bul soqqy lańkester úshin qaýipsiz baspana Gazada da, Tegeranda da, Dohada joq ekenin kórsetti. Biz lańkestik kóshbasshylaryna qaı jerde jasyrynsa da qarsy áreket etemiz, - dedi Izraıldiń BUU-daǵy elshisi Danı Danon.
Qatar premer-mınıstri jáne syrtqy ister mınıstri sheıh Muhammed ben Abdýlrahman ál-Tanı de úzildi-kesildi ustanymyn bildirdi. Ol Izraıldi Gazadaǵy soǵysty aıaqtaý áreketine nuqsan keltirdi dep aıyptap, Dohanyń araǵaıyndyq mıssııasyn jalǵastyratynyn basa aıtty.
– Kelissóz kezinde bizdiń aýmaqqa jasalǵan shabýyl Izraıldiń shynaıy nıetin áshkereledi. Oǵan Palestına halqyn máńgi qaıǵy-qasiretten aryltpaý mańyzdy, - dep atap ótti ál-Tanı.
Qaýipsizdik keńesi sondaı-aq Pákistannyń Izraılge qarsy aıyptaýlaryn tyńdady, al AQSh jaǵdaıdy Izraıldiń kepilge alynǵandardy bosatý jónindegi mindettemesine nuqsan keltirý úshin paıdalanbaýdy eskertti.
Aljır óz málimdemesinde agressor týraly tikeleı aıtylmaǵanyna ókinish bildirdi.
– Zorlyq-zombylyqty toqtatpasa - órshı beredi, jaýapsyzdyq – soǵys órtin tutatady. Halyqaralyq qaýymdastyqtyń únsizdigi haosqa ákeledi, - dedi Aljır elshisi Amar Bendjama.
BUU Qaýipsizdik keńesi jaǵdaıdyń ýshyǵýyna jol bermeý kerektigin atap ótip, Qatarmen yntymaqtastyǵyn qýattap, onyń egemendigi men aýmaqtyq tutastyǵyn saqtaýdy jaqtady. Málimdemede kepilge alynǵandardy bosatý jáne Gazadaǵy soǵysty aıaqtaý basymdyq bolyp qala beretini erekshe ataldy.
Aıta keteıik, Izraıl 9 qyrkúıekte Qatar astanasy Dohaǵa áýeden shabýyl jasap, nysanaǵa palestınalyq HAMAS-tyń saıası bıýrosynyń múshelerin alǵanyn málimdegen bolatyn. Soqqydan 6 adam, onyń ishinde toptyń bas kelissózshisi Halıl ál-Haııdiń uly men Qatar Іshki ister mınıstrliginiń qyzmetkeri qaza tapty.
Keıin Netanıahý Dohaǵa ne úshin soqqy jasaǵanyn aıtty.
Buǵan deıin Qasym-Jomart Toqaev Dohada Izraıl bıligi jasaǵan áskerı aktsııany aıyptaǵanyn jazǵan edik.