BUU Qaýipsizdik Keńesi daǵdarysqa ushyraýda — Memleket basshysy

ASTANA. KAZINFORM — Prezıdent Qasym-Jomart Toqaev Al Jazeera telearnasyna bergen eksklıýzıv suhbatynda álemdik tártip taqyrybyna qatysty pikir bildirdi.

Al Jazeera: Búginderi Astana halyqaralyq forýmy ótip jatyr. Bul Qazaqstannyń orta derjavalar halyqaralyq kópjaqty júıeni qoldaýda úlken ról atqarýy tıis dep sanaıtynyn bildire me?

— Álbette. Jahandyq beıbitshilik pen qaýipsizdikti qamtamasyz etýde orta derjavalar úlken ról atqarýy tıis ekenine jáne mýltılateralızmniń mańyzyna anyq senemin.

Al Jazeera: Prezıdent myrza, keıde uly derjavalar mýltılateralızm júıesin buzýy múmkin dep sanaısyz ba? Keı kezderi biz «Eń aldymen Amerıka» degen ustanym týraly, kópjaqty tetikter emes ekijaqty qatynastardyń mańyzy jaıynda sóz qozǵaıtyn keıbir uly derjavalardyń málimdemelerin estip jatamyz.

— Iá, mundaı jaǵdaı baıqalady ári mýltılateralızm júıesi álsirep barady. Ózińiz de bilesiz, BUU Qaýipsizdik Keńesi daǵdarysqa ushyraýda. Onyń bıligi de, negizgi halyqaralyq problemalardy sheshýge nıeti de joq.

Al Jazeera: Bul álemge qaýip pe?

— Árıne, bul úlken syn-qater. Sol sebepti Qazaqstan sekildi orta derjavalar negizgi halyqaralyq problemalardy sheshýde jáne retteýde mańyzdy ról atqarýy tıis dep sanaımyn. Qazaqstan Birikken Ulttar Uıymyn reformalaýdy qoldaıdy. Birikken Ulttar Uıymy qurylǵanda oǵan 51 memleket múshe bolǵan edi. Al qazir Uıymnyń 193 múshesi bar.

Buǵan deıin Prezıdent Qazaqstan — Eýrazııadaǵy, ásirese Ortalyq Azııadaǵy turaqtylyq pen qaýipsizdiktiń tiregi ekenin aıtqan edi.