BUU Qaýipsizdik Keńesi 2027 jylǵa deıin Lıvandaǵy UNIFIL mıssııasyn aıaqtaý týraly sheshim qabyldady

ASTANA. KAZINFORM – Lıvannyń ońtústiginde shamamen jarty ǵasyr qyzmet atqarǵan BUU-nyń ýaqytsha kúshteri (UNIFIL) óz jumysyn toqtatady.

Beısenbi kúni BUU Qaýipsizdik Keńesi mıssııa mandatyn 2026 jyldyń sońyna deıin uzartý týraly sheshim qabyldady. Osydan keıin 2027 jyldyń 1 qańtarynan bastap 10 500-ge jýyq áskerı jáne azamattyq qyzmetkerlerden turatyn kópultty kontıngent Lıvan úkimetimen kelise otyryp, kezeń-kezeńimen shyǵarylatyn bolady. Qujatta qaýipsizdik fýnktsııalaryn tek Lıvannyń ulttyq qarýly kúshterine berý qajettigi basa kórsetilgen.

Rezolıýtsııa biraýyzdan qabyldandy. Degenmen sońǵy aılarda mıssııany «tıimsiz» dep synap, onyń jumysyn toqtatýdy talap etken AQSh pen Izraıl boldy.

«Bul – Amerıka Qurama Shtattarynyń UNIFIL mandatyn sońǵy ret qoldaýy», – dedi AQSh-tyń BUU-daǵy Elshisiniń mindetin atqarýshy Dorotı Shı.

Onyń aıtýynsha, Lıvandaǵy qaýipsizdik sharttary «kúrt ózgergen» jáne úkimetten úlken jaýapkershilikti talap etedi.

Rezolıýtsııanyń maqsaty – Lıvan úkimetin eldiń ońtústiginde, BUU belgilegen «Kók syzyqtyń» Izraılmen shekarasynyń soltústiginde qaýipsizdiktiń jalǵyz qamtamasyz etýshisi etý.

2025 jylǵy 1 tamyzdaǵy jaǵdaı boıynsha UNIFIL quramynda 47 elden 10 509 qyzmetker bar. Qazaqstan mıssııaǵa úsh bitimgerin jibergen.

UNIFIL 1978 jyly Izraıl áskerleriniń Lıvannyń ońtústiginen shyǵarylýyn qadaǵalaý úshin qurylǵan bolatyn. 2006 jylǵy soǵystan keıin onyń mandaty keńeıtilip, Izraıl men «Hezbolla» shııttik qozǵalysy arasynda býferlik aımaqty qamtamasyz etý mindeti júktelgen.

2024 jyldyń kúzinde Izraıl men «Hezbolla» arasyndaǵy qaqtyǵys qaıta bastalǵannan keıin, Lıvan bıligi álsiz ári qarjylandyrýy jetkiliksiz ulttyq armııanyń búkil aýmaqty ózdiginen patrýldeýge qaýqarsyz ekenin aıtyp, UNIFIL mıssııasyn saqtap qalýǵa shaqyrǵan edi.

Izraıl tarapy bitimgershilik kúshterin «Hezbollanyń áskerı áleýetin shekteýge qabiletsiz boldy» dep birneshe ret aıyptady. Izraıldiń BUU-daǵy turaqty ókili Dennı Danon Qaýipsizdik keńesiniń sheshimin quptap, «Mıssııanyń ondaǵan jyldarǵa sozylǵan jumysy Hezbollany kúsheıtip, ony aımaqtyq qaýipke aınaldyrdy» dedi.

Beırýt, kerisinshe, sheshimdi saqtyqpen qabyldady. Lıvan premer-mınıstri Navaf Salam qarar Izraıldi okkýpatsııalanǵan bes aımaqtan shyǵýǵa shaqyratynyn jáne memlekettiń egemendigin búkil aýmaqqa taratý qajettigin qýattaıtynyn atap ótti.

Aljır ókili Amar Benjama da uqsas pikir bildirip, bitimgershilik kúshterdiń «turaqtylyqty saqtaýda taptyrmas ról atqarǵanyn» jáne olardyń shyǵýy atysty toqtatýǵa qaýip tóndirýi múmkin ekenin aıtty.

AQSh Lıvan terrıtorııasynan Izraıl áskerin kezeń-kezeńimen shyǵarý jáne eldiń ońtústiginde ekonomıkalyq damý aımaǵyn qurý aıyrbasyna «Hezbolla» uıymyn qarýsyzdandyrý josparyn ilgeriletýde. Alaıda uıym bul bastamalardy qabyldamaǵan jáne Izraıl armııasynyń qatysýy jalǵasyp otyr.

Aıta keteıik, BUU Gaza sektoryndaǵy asharshylyqty alǵash ret resmı túrde rastady.