BUU Qaýipsizdik Keńesi 20 maýsymda Taıaý Shyǵys pen Ýkraınaǵa qatysty eki otyrys ótkizedi

ASTANA. KAZINFORM — 20 maýsym, juma kúni BUU Qaýipsizdik keńesi Iran men Izraıl arasyndaǵy shıelenis jáne Ýkraınadaǵy jaǵdaıǵa qatysty eki otyrys ótkizedi, dep habarlaıdy TASS.

— Irannyń ótinishi boıynsha otyrys juma kúni tańǵy saǵat 10:00-de (Astana ýaqytymen 17:00), al Ýkraına máselesine arnalǵan otyrys saǵat 15:00-de (Astana ýaqytymen 22:00) ótedi, — dedi maýsym aıynda BUU Qaýipsizdik keńesine tóraǵalyq etip otyrǵan Gaıana eliniń turaqty ókildigi jýrnalısterge.

Aıta keteıik, buǵan deıin Qaýipsizdik keńesi Taıaý Shyǵystaǵy jaǵdaı boıynsha 13 maýsymda shuǵyl jıyn ótkizgen bolatyn. Dál sol kúni Izraıl Irannyń ıadrolyq baǵdarlamasyna qarsy baǵyttalǵan «Qaıta oıanǵan arystan» operatsııasyn bastaǵan edi.

Eske sala keteıik, jýyrda Halyqaralyq atom energııasy jónindegi agenttiktiń (MAGATE) Basqarýshylar keńesi sońǵy 20 jylda alǵash ret Irannyń mindettemelerdi buzǵanyn rastaıtyn qarar qabyldady. Qujatta 2019 jyldan beri Iran ıadrolyq materıaldary men deklaratsııalanbaǵan nysandardaǵy qyzmeti jóninde tolyq ári ýaqtyly aqparat bermegeni aıtylǵan. Bul – formaldy mindettemelerdiń buzylýy sanalady, biraq mindetti túrde áskerı baǵdarlama bar degendi bildirmeıdi.

Atalǵan qarar qabyldanǵannan birneshe saǵat ótken soń Izraıl Natanz ben Fordo qalalaryndaǵy Irannyń ıadrolyq nysandaryna soqqy jasap, birqatar ırandyq áskerı basshylar, ıadrolyq fızıkter men beıbit turǵyndardy nysanaǵa alǵan.